भारतबाट दूध आयात गरेर  किसानलाई सिध्याउने षडयन्त्र गरियाे : निशा डाँगी

७ जेठ, काठमाडौं । सरकारले नेपाली किसानले उत्पादन गरेका दूध खरिद नगरी भारतबाट दूध आयात गर्ने योजना बनाएर गम्भीर षडयन्त्र सुरु भएको भन्दै सांसदहरुले संसद बैठकमा आवाज उठाएका छन् । 

राष्ट्रिय स्वतन्त्र पार्टी (रास्वपा) की सांसद निशा डाँगीले सोमबार प्रतिनिधिसभा बैठकको शून्य समयमा बोल्दै केही दलालहरुले नेपाली बजारमा दूधको अभाव भएको कृत्रिम हल्ला पिटेर भारतीय दूध भित्र्याएर नेपाली किसानलाई सिध्याउने चलखेल गरेको बताइन् । देशमै उत्पादन भएको ८५ प्रतिशत दूध बिक्री नभएको अवस्थामा उल्टै भारतबाट दूध आयात गर्नु ठीक नभएको उनले बताइन् । 

‘सहरी क्षेत्रमा दूधको अभाव भएको जनाउँदै केही दूध व्यवसायीहरुले भारतबाट दैनिक एक लाख ५० हजार लिटर बढी दूध आयात गर्नुपर्ने सुझाव सरकारलाई दिएका छन् । 

सांसद डाँगीले देशमा उत्पादन भएको ८५ प्रतिशत दूधले बजार पाउन नसकिरहेको भन्दै नेपाली किसानले उत्पादन गरेका सम्पूर्ण दूध बजारसम्म पुर्याउने काम सरकारले तत्काल सुरु गर्न माग गरिन् । किसानलाई अनुदान दिएर गाई भैंसी पालनमा प्रोत्साहन गर्न माग गरिन् ।

किसानको गोठमा गाई भैँसी भएपनि सहरी क्षेत्रमा दूधको अभाव भयो भनेर भारतबाट दूध ल्याउन सुझाव दिने तरिका देशको हितमा नरहेको भन्दै यसबारे राज्य सचेत हुन आग्रह गरिन् ।