काठमाडौंका १० तले घरका वृद्ध र मुसहर-डोम बस्तीका वृद्धलाई दिइने भत्ता एउटै हुनु विभेदकारी : जीवन परियार

८ जेठ, काठमाडौं । नेपाली कांग्रेसका सांसद जीवनबहादुर परियारले सामाजिक सरकारले वितरणा गर्दै आइरहेकाे सुरक्षा भत्तामा वर्गीकरण हुनुपर्ने बताएका छन् ।

सरकारले पेस गरेको आगामी आवको नीति तथा कार्यक्रममाथि सोमबार प्रतिनिधिसभाको बैठकमा छलफलमा भाग लिँदै कांग्रेस सहमहामन्त्री समेत रहेका सांसद परियारले काठमाडौंमा घर भएका वृद्ध र दुर्गम क्षेत्रमा रहेका गरिब परिवारका वृद्धलाई बाँडिने रकम दर एकी किसिमका हुनु विभेदकारी भएको बताए । सरकारले अहिले ६८ वर्ष उमेर पुगेका वृद्धवृद्धालाई मासिक ४ हजार रुपैयाँ वितरण गर्दै आइरहेको छ ।

‘काठमाडौंका १० तले घरका वृद्ध र तराईका गरिब समूदाय मुसहर र डोम बस्तीका वृद्धलाई बाँडिने सामाजिक सुरक्षा भत्ता एउटै किसिमका बनाइएको छ, यो सच्याउनु जरुरी छ’ सांसद परियारले भने, ‘केही मान्छेको हातमा बैंक र पैसा पुगेको छ, यो नभत्काएसम्म समाजको विभेद मेटाउनु पर्छ ।’

उनले दलित समूदाय समाजमा सबैभन्दा बढी अपहेलित र अपमानित रहेको बताए । सरकारमा बस्ने ‘उच्च’ जाति भन्नेहरुले सामाजिक मनोविज्ञान र आवश्यकतालाई बुझ्न नसक्दा अझै जातीय विभेद र छुवाछुतका घटना दोहोरिहेको बताए ।