२ हजारको नोट नचलाउने भारतको निर्णयले असर गर्दैन : राष्ट्र बैंक

८ जेठ, काठमाडौं । नेपाल राष्ट्र बैंकले भारु दुई हजारको नोट नचलाउने भारत सरकारको निर्णयले नेपालमा कुनै असर नपर्ने निष्कर्ष निकालेको छ । नेपालमा भारु दुई हजारको नोटले वैधता नपाएपनि सीमावर्ती क्षेत्रमा केही नोटहरु रहेको हुन सक्ने राष्ट्र बैंकको अनुमान छ । भारतले नोट साट्ने अवधि नतोकेकाले नसाटिने जोखिम नरहेको राष्ट्र बैंकको निष्कर्ष छ ।

सन् २०१६ मा भारत सरकारले नोटबन्दी गर्दा नेपालमा चलनचल्तीमा रहेको एक हजार र पाँच सय दरका ५ करोड भारतीय रुपैयाँ अझै नेपालको केन्द्रीय बैंकमा थन्किएको छ । भारतले त्योबेला एक हजारका भारु नोटमाथि प्रतिबन्ध लगाउँदा २ हजार दरका नोट प्रयोगमा ल्याएको थियो । पछिल्लो समयमा उक्त नोट बजारमा अभाव देखिएको र व्यापारीले नोट बैंकमा नभई घर वा लुकाएर राखेका कारण अभाव देखिएको निष्कर्षसहित २ हजार दरका नोट बजारबाट उठाउन लागिएको हो । 

नेपालमा भारु २ हजार दरका नोट पनि प्रतिबन्धित छ । यसले सीमा क्षेत्रको बजारमा बाहेक २ हजार दरका भारु नोट नेपालमा ठूला संख्यामा भएको हुनसक्ने सम्भावना न्यून रहेको नेपाल राष्ट्र बैंक आर्थिक अनुसन्धान विभागको दाबी छ । 

 ३० सेप्टेम्बर २०२३ सम्मको समयसीमाभित्र साट्न र भारतको बैंकमा जम्मा गर्ने समय दिएकोले २०१६ को नोटबन्दीको समयको जस्तो नसाटिने जोखिम नरहेको विभागको दाबी रहेको छ ।