शरणार्थी प्रकरणमा पूर्वप्रधानमन्त्रीलाई अनुसन्धान दायरामा ल्याउन माग

७ जेठ,, काठमाडौं । नेपाल मजदुर किसान पार्टी (नेमकिपा)का सांसद प्रेम सुवालले नक्कली शरणार्थी प्रकरणमा पूर्वप्रधानमन्त्रीलाई पनि अनुसन्धानको दायरमा ल्याउन माग गरेका छन् ।

प्रतिनिधिसभा बैठकको शून्य समयमा बोल्दै उनले प्रधानमन्त्री प्रणालीमा मन्त्रीको कामकारवाहीको जिम्मेवारी प्रधानमन्त्रीले लिनुपर्ने बताउँदै प्रकरणमा पूर्वप्रधानमन्त्रीहरूलाई पनि बयानमा बोलाइ अनुसन्धानलाई पूर्ण बनाउन सरकारसँग माग गरे । नक्कली शरणार्थी प्रकरणमा दुई जना तत्कालीन उपप्रधानमन्त्री प्रहरी हिरासतमा रहेकाले यसमा पूर्वप्रधानमन्त्री पनि संलग्न भएको आशंका उनले व्यक्त गरे ।

पूर्वप्रधानमन्त्री केपी शर्मा ओलीले ४ सय नेपालीलाई नक्कली शरणार्थी बनाएर अमेरिका छिराइएको अभिव्यक्ति दिएको भन्दै त्यसबारे ओलीलाई अनुसन्धान गर्नुपर्ने बताए । ओलीले ४ सय नेपालीलाई भूटानी शरणार्थी बनाएर १० वर्षअगाडि नै अमेरिका छिराएको प्रमाण आफूसँग भएको अभिव्यक्ति संसदमा दिएका थिए । 

हिरासतमा रहेका कांग्रेसका नेता समेत रहेका बालकृष्ण खाण तत्कालीन अवस्थामा गहृमन्त्री रहेका बेला प्रधानमन्त्री शेरबहादुर देउवा थिए । सुवालले देउवालाई पनि अनुसन्धानमा ल्षाउनुपर्ने तर्क गरे ।