संसदमा दल एण्ड कम्पनी चलिरहेको छ : प्रभु साह

८ जेठ, काठमाडौं । आम जनता पार्टी (आजपा)का अध्यक्ष एवं संघीय सांसद प्रभु साहले संसदमा जनप्रतिनिधिको अधिकार प्रयोगभन्दा दलीय ह्वीपको नाममा ‘दल एण्ड कम्पनी’ चलिरहेको बताए । 

सोमबार प्रतिनिधिसभाको बैठकमा सरकारको आगामी आवको नीति तथा कार्यक्रममाथिको छलफलमा भाग लिँदै सांसद साहले जनताको सर्वोच्च निकाय प्रतिनिधिसभामा सांसदहरुले स्वतन्त्रपूर्वक आफ्नो भनाइ राख्ने र मत दिने अधिकार प्रयोग गर्न नपाएको बताए ।

उनले संविधानको आवरणमा संघीय गणतन्त्र लेखिए पनि भित्र दलीय शासन हुने लेखिएका कारण नाम मात्रको गणतन्त्रले देश जनताको हितमा काम गर्न नसक्ने बताए । ठूला दल भनिनेहरुले आफूलाई कानूनभन्दा माथि राख्ने गरिएको र कानून मिच्ने उनीहरुबाटै भइरहेको उनको भनाइ थियो । 

अहिले मुठ्ठीभर मान्छेहरुको हातमा पैसा पुगेका कारण अर्थतन्त्रमा समस्या आएको बताए । वर्तमान व्यवस्थाकै करणा व्यक्तिको हातमा पैसा थुप्रिने र केही मान्छेहरुले नै सारा जनतामाथि खटनपटन चलाइरहेको बताए । यो व्यवस्था रहेसम्म भ्रष्टाचार र विभेद रोकिने कल्पना गर्न नसकिने उनको भनाइ थियो ।

कम्पनीमा धेरै शेयर हुनेको बढी बोलवाला चलेजस्तै दलमा प्रभाव र पैसा जमाउन सक्नेहरुको हालीमुहाली चल्ने गरिएको उनको आरोप छ । ‘दलका तपाईँ माननीयहरु, के स्वतन्त्रपूर्वक संसदमा धारणा राख्न पाइरहनु् भएको छ ? छैन भने यो सदनमा सत्य कुरा राख्न किन सक्नु हुन्न ?’ उनको प्रश्न थियो ।

‘यो व्यवस्था रहेसम्म नीति तथा कार्यक्रममा सुधार आउँदैन । सुधार नआएपछि जनताले विकल्प खोज्छन्’ साहले भने, ‘संसद बैठकमै दलीय विभेद छ । बोल्न कसैलाई धेरै मिनेट, कसैलाई ज्यादै थोरै मिनेट किन गरिन्छ ? पहिला यहीबाट विद्रोह आवश्यक देखिएको छ ।