बाराको सुवर्णपुर गाउँपालिका कार्यालयमा तोडफोड

८ जेठ, बारा । बाराको सुवर्णपुर गाउँपालिका कार्यालयमा तोडफोड गरिएको छ । गाउँपालिकाले प्रधानाध्यापकहरुको सरुवाको विषयलाई लिएर विद्यार्थीहरुले तोडफोड गरेका हुन् । 

गाउँपालिकाले हर्दिया माविका प्रधानाध्यापक रामएकवाल प्रसाद, देवापुर वहुर्आका प्रधानाध्यापक चन्देश्वरप्रसाद यादव, नेराप्रावि मझरीका प्रधानाध्यापक धर्मेन्द्रप्रसाद यादव र कवही जगाद माविका प्रधानाध्यापक नथुनीप्रसाद यादवलाई गाउँपालिकाले सरुवा गरेको थियो । 

सरुवाको विषयमा असन्तुष्ट विद्यार्थी र समूहले सोमबार गाउँपालिका कार्यालयमा तोडफोड गरेका हुन् । उनीहरुले गाउँपालिका अध्यक्ष राजेशप्रसाद यादव, उपाध्यक्ष पुनम कुमारीको कार्यकक्ष तोडफोडसँगै कागजपत्रमा जलाउने कोशिस गरेका छन् । मोटरसाइकलमा क्षति पुर्याएका छन् ।

परिस्थितिलाई नियन्त्रणमा लिन प्रहरीले १० सेल अश्रुग्यास प्रहार गरेको जनाइएको छ । सरुवा निर्णय नमान्ने उनीहरुको अडान छ । पालिकाले भने सहमतिमै सरुवाको काम भएको दाबी गरेको छ ।