ढुंगा-गिट्टी निर्यात गर्ने सरकारकाे नीति राष्ट्रघाती : सांसद आचार्य

८ जेठ, काठमाडौं । नेकपा (एमाले)का सांसद भीम आचार्यले सरकारले ल्याएको चुरेका ढुंगा गिट्टी विदेश निर्यात गर्ने नीति राष्ट्रघाती भएको बताएका छन् ।

सरकारले पेस गरेको आगामी आवको नीति तथा कार्यक्रमबारे सोमबार प्रतिनिधिसभाको बैठकमा भएको छलफलमा भाग लिँदै सांसद आचार्यले नेपाली भूमिको ढुंगा र गिट्टी विदेशमा बिक्री गर्ने ल्याएर राष्ट्रघाती श्रृंखला सुरु गरेको बताए । सरकारको उक्त नीतिलाई एमालेले विरोध गर्ने बताए । 

उनले देशभित्रको ढुंगा–माटो वा गिट्टी निर्यात गर्ने कुरा राष्ट्रघाती भएको र यसलाई समर्थन गर्नेहरु राष्ट्रघाती ठहरिने बताउँदै मातृभूमिको ढुंगा गिट्टी विदेशमा बेच्ने कुरा नीति तथा कार्यक्रमबाट हटाउन माग गरे । 

‘ढुंगाबाट सिमेन्ट बनाएर बरु सिमेन्टलाइ विदेश निर्यात गर्न सकिन्छ, तर ढुंगा नै बिक्री गर्ने कुरा देशभक्ति हुन सक्दैन’ आचार्यले भने, ‘सरकारले समयमै आफ्नो गल्ती सच्याओस् ।’ उनले सरकारले ल्याएको नीति तथा कार्यक्रमले जनता र देशको आवश्यक सम्बोधन गर्न नसक्ने भन्दै एमालेले समर्थन नगर्ने बताए ।

सरकारको नीति तथा कार्यक्रममा व्यापार घाटा घटाउने बुँदामा चुरेका ढुंगा गिट्टी निर्यात गर्न सकिने उल्लेख छ । जसको सत्तारुढ दलकै सांसदहरुले विरोध गरेका छन् ।