कक्षा १२ उत्तीर्ण गरेका विद्यार्थीलाई विदेश जान राेक लगाउन माग

८ जेठ, काठमाडौं । नेकपा (एमाले)का सांसद् रघुजी पन्तले १२ कक्षा मात्र पास गरेका विद्यार्थीलाई विदेश जान रोक्ने पर्ने बताएका छन् । सोमबार प्रतिनिधि सभामा सरकारको नीति तथा कार्यक्रममाथिको छलफलमा भाग लिँदै सांसद् पन्तले कक्षा १२ कक्षा उत्तीर्ण गरेका विद्यार्थीलाई छात्रावृत्तिमा बाहेक आफ्नै खर्चमा विदेशमा पढ्न पठाउन नहुने प्रस्ताव राखे । 

स्नातक तह पास गरेका विद्यँर्थीलाई मात्र विदेशमा अध्ययनका लागि पठाउने नीति बनाउन सरकारसँग माग गरे । सानै उमेरका विद्यार्थी विदेशमा पुगेर लागू औषधको कुलतमा फस्ने र गलत काममा लागेको पाइएको भनेर विभिन्न देशले आग्रह गरिरहेको उनको भनाइ थियो । 

‘कम्तिमा स्नातक उत्तिर्ण गरेका विद्यार्थीलाई मात्रै विदेश जान दिनुपर्छ। कति जना ड्रगिस्ट भएका छन्, कतिपय गलत संगतमा परेका छन् । विदेशी सम्बन्धन लिएर नेपालभत्रि पढाउने कलेजलाई बन्द गर्नुपर्छ’ उनले भने । 

मुलुको शिक्षालाई २१औं शताब्दीको चुनौतिलाई सामना गर्ने शिक्षा बनाउनुपर्ने बताए । आफ्नो खर्चमा विदेश पठाउन कम्तिमा स्नातक उत्तीर्ण गरेकालाई मात्रै अनुमति दिने व्यवस्था मिलाउन सरकारसँग आग्रह गरे । सानै उमेरमा विदेशमा पढ्न जाँदा देशभक्तिको भावना हराउँदै गएको उनको भनाइ थियो ।