संसद बैठकमा केसीकाे प्रश्नः ‘केपी ओलीले नक्कली शरणार्थीबारे कुरा किन लुकाए ?

९ जेठ, काठमाडौं । नेपाली कांग्रेसका नेता एवं सांसद अर्जुननर सिंह केसीले नक्कली भूटानी शरणार्थी प्रकरणमा प्रमाण पुग्ने सबैलाई अनुुसन्धानको दायरामा ल्याउन सरकारसँग माग गरे । 

मंगलबार प्रतिनिधिसभाको बैठकमा विशेष समय लिएर बोल्दै सांसद केसीले प्रकरण जघन्य अपराध भएको र यसमा कोही पनि दोषी छु्टाउन नहुने बताए । 

प्रकरणबारे एमाले अध्यक्ष केपी शर्मा ओलीले प्रकरणमा ४ सय नेपाली विदेश पुगिसकेको अभिव्यक्ति संसदको रोष्ट्रमबाट दिइसकेको अवस्थामा प्रशासनले उनलाई बोलाएर सोधुपुछ गर्नुपर्ने बताए । 

‘माननीय ओलीज्यूलाई प्रकरण आफूलाई पहिल्यैदेखि थाहा भएको बताएका छन् । ४ सय नेपाली गैरशरणार्थी बनेर विदेश पुगसकेको बताएका छन्’ सांसद केसीले भने, ‘जघन्य अपराधसम्बधी विषयमा यति गम्भीर खुलस्त गर्ने र धेरै कुरा थाहा भएको भन्ने व्यक्तिलाई तत्काल अनुसन्धानको दायरामा ल्याउनुपर्छ ।’

उनले ओलीले प्रकरणमा निष्पक्ष छानबिन र पूर्ण अनुसन्धानमा सहयोग पुर्याउनुपर्ने बताए । ‘संसद बैठकमा सबै कुरा भन्नु भन्नुभयो तर केही भन्नुभएन’ उनले भने, ‘धेरै कुरा थाहा छ भन्ने तर कुरा लुकाउने काम नगरौं।’ दोषी कसैलाई उन्मुक्ति नमिल्ने गरी मुद्दा चलाउनुपर्ने उनको भनाइ छ । 

यस्तै, केसीले सरकारले ल्याएको आउँदा आर्थिक वर्षको नीति तथा कार्यक्रम वस्तुनिष्ठ र आवश्यकतामा आधारित रहेको बताए । कार्यान्वयनमा सत्ता पक्ष र प्रतिपक्ष नभनी एकजुट भएर अगाडि बढनुपर्नेमा जोड दिए । गाली र तालीले मात्र नीति तथा कार्यक्रम सफल नहुने उनको भनाइ छ ।