नीति तथा कार्यक्रमलाई बजेटमा ‘टाईअप’ गराैं : स्वर्णिम वाग्ले

९ जेठ, काठमाडौं । रास्वपा सांसद स्वर्णिम वाग्ले सरकारको नीति तथा कार्यक्रमलाई बजेटमा ‘टाइअप’ गर्नुपर्ने बताएका छन् । मंगलबार प्रतिनिधिसभाको बैठकमा सरकारको नीति तथा कार्यक्रममाथि धारणा राख्दै सांसद वाग्लेले नीति र कार्यक्रम अगाडि ल्याउने परम्परालाई तोडेर बजेटमै समेटनुपर्ने बताए । 

बजेटभन्दा अगाडि ल्याउने नीति तथा कार्यक्रमकै अधिकांश विषय बजेटमा आउने गरिएको बताउँदै आउने वर्षका कार्यक्रमलाई दुई दुईपटक गरी ल्याउँदा छलफलकै नाममा सांसदहरुको समय बर्बाद भएको बताए । सांसदहरुले जति पनि सुझाव र संशोधन दिएपनि ‘कमा, फुलस्टप’ सम्मन परिवर्तन नहुने परम्परा यसपटक पनि दोहोरिनेमा आफूलाई कुनै शंका नरहेको उनले बताए ।

‘नीति तथा कार्यक्रम र बजेटलाई पटपकटक गरी ल्याउँदा हामी सांसदहरुले समय बर्बाद भएको छ । संशोधन र सुझाव जे दिएपनि परिवर्तन हुने कुरा देखिँदैन, यो सरकारको परम्परा नै हो’ उनले भने, ‘त्यसकारण बजेटमै नीति तथा कार्यक्रमका मुख्य बुँदा बनाएर रकम विनियोजन गर्ने र त्यसमा सैद्धान्तिक र व्यवहारिक पक्षबारे गम्भीर छलफल गर्दा परिणाममुखी हुनेछ, उत्तरदायी हुनेछ ।’

नीति र कार्यक्रममै विषय बजेटमा दाेहाेरिने गरिएकाे उनकाे भनाइ छ । ‘फेरि नीति तथा कार्यक्रमै कुरा बजेटमा दोहोर्याउनु हुन्छ, नीतिले केसम्म गर्छ ? भन्ने कुराकै टुंगो छैन, क्रम भंगतातिर लाने हाे भने यो निर्जीव पानाहरुलाई बजेटसँगै लगेर गाभिऔं’ उनले भने ।

उनले सरकारको नीति तथा कार्यक्रम कर्मकाण्डी बाहेक केही नभएको बताउँदै पुनर्लेखन वा फिर्ता लिनु भन्नुको कुनै अर्थ नहुने बताए । यसमा रास्वपाले ब्यंग्य र तिक्तता नेपोख्ने, बरु रचनात्मक सुझाव दिने बताउँदै बजेटको रुप हेरेर मात्र नीति र कार्यक्रमको औचित्य सावित हुने उनको भनाइ थियो ।