बजेट कटौती रोक्न माग गर्दै सुदूरपश्चिमको टोली सिंहदरवारमा

९ जेठ, काठमाडौं  । संघीय सरकारले प्रदेशमा दिने बजेट कटौती गर्ने जानकारी स्वरूप पत्र पठाएपछि   बजेट कटौती नगर्न माग राख्दै सुदूर पश्चिम प्रदेशका मुख्यमन्त्री कमलबहादुर शाहसहितको टोली काठमाडौं  आएको छ । टोलीले मंगलबार राष्ट्रिय योजना आयोगका उपाध्यक्ष डा. मीनबहादुर श्रेष्ठलाई भेटेर आफ्ना गुनासाहरू राखेको छ । 

सुदूर पश्चिम प्रदेशका सभामुख भीमबहादुर भण्डारी, प्रमुख प्रतिपक्षी दलका नेता, र सबै मन्त्रीहरुसहित मुख्यमन्त्री शाहले आयोगका उपाध्यक्ष श्रेष्ठसँग भेटेर आगामी बजेट र सुदूर पश्चिम प्रदेशका समस्या राखेका छन् । भेटमा शाहले आगामी आर्थिक वर्षको बजेटमा सुदूर पश्चिम प्रदेशलाई विशेष प्राथमिकतामा राख्न माग गरेका छन् । अथाह सम्भावनाहरु भएर पनि सुदूर पश्चिम पछाडि परेको भन्दै उनले आयोगको ध्यानाकर्षण गराएका हुन् । 

भेटमा आयोगका उपाध्यक्ष डा. श्रेष्ठले बजेट माग्न सिंहदरबार धाउनुपर्ने वाध्यता अब हटेको बताएका थिए । कुनै बेला काठमाडौं आउनका लागि भारतको बाटो प्रयोग गर्नुपर्ने वाध्यता रहेका सुदूर पश्चिम टाढाजस्तो लागे पनि अहिले काठमाडौंबाट धेरै टाढा नरहेको सुनाएका थिए । 

सुदूर पश्चिमलाई सरकारले ल्याएको नीति तथा कार्यक्रमले राम्रोसँग समेटेको भन्दै उनले बजेटले पनि राम्रै स्थान दिनेमा ढुक्क रहन आश्वासन दिए । सिंहदरबारबाट सुदूर पश्चिम र कर्णालीका योजना बनाएर हुँदैन भनेर नै संघीयता आएको भन्दै श्रेष्ठले सुदूर र कर्णालीका योजना सुदूर कर्णालीले नै बनाउने हो भनेका थिए । टोलीले अर्थमन्त्रीसँग पनि भेट गर्दैछ ।