कर्मचारीतन्त्र भ्रष्ट र जब्बर भएसम्म परिवर्तनको गुञ्जायस छैन : सांसद पाण्डे

९ जेठ, काठमाडौं । नेकपा (एकीकृत समाजवादी)का सांसद राजेन्द्रप्रसाद पाण्डेले मुलुकका कर्मचारीतन्त्र भ्रष्ट र जब्बर भएसम्म परिवर्तन संभवन नरहेको बताएका छन् ।

मंगरबार प्रतिनिधिसभाको बैठकमा सरकारको आगामी आवको नीति तथा कार्यक्रममाथिको छलफलमा भाग लिँदै सांसद पाण्डेले कर्मचारीमा देखिएको भ्रष्ट मानसिकता र अहंले जनताको परिवर्तनको बाटो वर्षौंदेखि रोकिएर कष्ट भोगिरहेको बताए । यसलाइ नभत्काएसम्म सरकारले गर्न खाेजेकाे तीव्र विकास र समृद्धि संभव नरहेकाे उनकाे भनाइ थियाे ।

उनले प्रमुख प्रतिपक्षीले भनेजस्तो सरकारको नीति र कार्यक्रम पुनर्लेखन गर्नुपर्ने खालका नरहेको बताए । विराेधका लागि मात्र विराेध गर्ने संस्कार विकासका बाधक रहेकाे उनकाे भनाइ थियाे ।

नीति तथा कार्यक्रममा शिक्षा, स्वास्थ्य, कृषि र पर्यटन क्षेत्रको विकास गर्न भरपूर योजना र नीति समेटिएको उनले बताए । उनले बिग्रिँदै गएको अर्थतन्त्र सुधारका लागि सरकारले ‘३ खम्बे’ नीति लिनुपर्ने बताए । मुलुकलाई आर्थिक संकटबाट जोगाउन सरकार, नीति क्षेत्र र सहकारीबीच बलियो समन्वय गर्ने नीति आवश्यक रहेको बताए । 

उनले जस्तोसुकै कठिन अवस्थामा पनि राष्ट्रिय गौरवका आयोजना अगाडि बढाउनुपर्ने बताए । बुढी गण्डकी जलविद्युत आयोजना सुरु गर्न रकम पर्याप्त भएको उनले बताए ।

साथै टुटल, पठाओ जस्ता नयाँ उद्यमबाट नेपाली उपभोक्ताले तिरेको पैसा विदेश गइरहेको उनले बताए । यसलाई व्यवस्थित गरेर रकम विदेश जानबाट रोक्न तत्काल नीति बनाउनुपर्ने बताए ।

देशभित्रै रोजगार सिर्जना गर्न र पैसा रोक्न युवा जनशक्तिहरुलाई तालिम दिन नीतिमै उल्लेख गर्ने र बजेट छुट्याउने काम सरकारले गर्नुपर्ने उनले बताए । आफू वाग्मतीमा मुख्य छँदा तालिमका लागि १५ करोड रुपैयाँ बजेट छुट्याएको र त्यो अहिले परिणामुखी बनेको उल्लेख गरे ।