मधेश प्रदेशका नवनियुक्त ३ जना मन्त्रीले लिए शपथ

९ जेठ, जनकपुरधाम । मधेश प्रदेश मन्त्रिपरिषद् विस्तार भएको छ । मुख्यमन्त्री सरोज यादवको सिफारिसमा नेपाली कांग्रेसका २ र नेकपा (एकीकृत समाजवादी)का १ जनालाई मन्त्री नियुक्त गर्दै प्रदेश प्रमुख हरिशंकर मिश्रबाट पद तथा गोपनीयताको शपथ खुवाएका छन् । 

प्रदेश प्रमुख कार्यालययका अनुसार प्रदेश सरकारमा कांग्रेसबाट भौतिक पूर्वाधार विकास मन्त्रीका रूपमा कृष्णा प्रसाद यादव र  स्वास्थ्य मन्त्रीको रूपमा विरेन्द्र प्रसाद सिंहले शपथ लिएका छन् । भूमि व्यवस्था, कृषि तथा सहकारी मन्त्रीका रूपमा एकीकृत समाजवादीबाट गोबिन्द बहादुर न्योपानेले शपथ लिएका छन् । 

यसैबीच मन्त्रालय भागबण्डामा असन्तुष्टि जनाउँदै माओवादी केन्द्रले भने सरकारमा रहेका उद्योग वन तथा पर्यटन मन्त्री सुनिता यादव र राज्यमन्त्रीलाई फिर्ता बोलाएको छ । मधेश प्रदेश सरकारमा रहेका मन्त्री सुनिता यादव र रहबर अन्सारीलाई फिर्ता बोलाएको मधेस प्रदेशका दलका नेता भरत प्रसाद साहले बताए । बैठक बसेर सरकारलाई दिएको समर्थन फिर्ता लिने उनले बताए । 

मुख्यमन्त्री यादवको कार्यशैलीप्रति जनमत र लोसपा पनि असन्तुष्ट बनेका छन् । लोसपालाई एक मन्त्रालय दिइएको तर उसले नाम दिएको छैन । जनमतका मन्त्री वसन्त कुशवाहालाई भूमि व्यवस्था, कृषि तथा सहकारीबाट हटाएर विना विभागीय बनाइदिएका छन् ।