कुटनीतिक तवरबाट सीमा समस्या समाधान गरिने प्रधानमन्त्रीको प्रष्टोक्ति

९ जेठ, काठमाडौं । प्रधानमन्त्री पुष्पकमल दाहाल ‘प्रचण्ड’ले कुटनीति माध्यममार्फत सीमा विवाद समाधान गरिने प्रष्ट पारेका छन् ।  

मंगलबार बसेको राष्ट्रियसभा बैठकमा सरकारको आगामी आर्थिक वर्षको नीति तथा कार्यक्रममाथि राष्ट्रिय सभा सदस्यहरुले उठाएका प्रश्न र जिज्ञासाको जवाफ दिँदै प्रधानमन्त्री प्रचण्डले सीमा समस्या ऐतिहासिक सन्धि, नक्सा र तथ्य प्रमाणका आधारमा कुटनीतिक माध्यमबाट समाधान गर्ने बताए । 

उनले लिम्पियाधुरा, लिपुलेक र कालापानी नेपाली भूमि हो भन्नेमा सरकार प्रष्ट रहेको जानकारी दिए । भारतसँग थाती रहेको सीमासम्बन्धी विषयलाई ऐतिहासिक सन्धी नक्सा तथ्य र प्रमाणका आधारमा कुटनीतिक माध्यमबाट समाधान गरिने प्रतिबद्धता जनाए । 

सांसदहरुले प्रधानमन्त्रीको निकटभविष्यमा हुन गइरहेको भारत भ्रमणमा भारतले मिचेको नेपाली भूमिलाई फिर्ता गर्न ठोस प्रस्ताव राख्न सुझाव दिँदै आएका बेला प्रधानमन्त्रीको यस्तो प्रष्टोक्ति आएको छ ।