पुरानो दाबी भुक्तानी सक्ने याेजनामा स्वास्थ्य बीमा बोर्ड

९ जेठ, काठमाडौं । स्वास्थ्य बीमा बोर्डले पुराना दाबीलाई पहिलो प्राथमिकता दिँदै भुक्तानी दिन सुरु गरेको छ । बोर्डले यसअघिका नयाँ र पुराना दुवै दाबीको भुक्तानीमा परिवर्तन गरेको हो ।

बोर्डको नयाँ लक्ष्य अनुसार अगाडिदेखि बाँकी रहेका दाबीहरुलाई सकेर मात्र नयाँ हेर्ने बोर्ड प्रवक्ता शम्भु ज्ञवालीले बताए । उनका अनुसार वैशाखदेखि यताका दाबीलाई हेरिएको छैन । चालु आर्थिक वर्षको माघसम्मको दाबी भुक्तानी फर्छ्यौट गरेको उनले बताए ।

चालु आर्थिक वर्षमा मात्र ७ पटकमा ८ अर्बभन्दा बढीको दाबी भुक्तानी गरिएको छ । असार मसान्तसम्म १२ अर्ब रुपैयाँसम्म भुक्तानी गर्ने लक्ष्य राखेको बोर्डले जनाएको छ । 

लामो समयदेखि भुक्तानी पर्खिरहेका बीमितले अब पर्खन नपर्ने बोर्डको दाबी छ । भुक्तानीका लागि ठूला अस्पतालहरुबाट धेरै दाबी पर्ने गरिएको छ । हाल देशभर ४ सय ५७ वटा सेवा प्रदायक संस्थामा करिब ६२ लाख जनसंख्या आवद्ध रहेको बोर्डको दाबी छ ।