विश्व बैंकबाट १२० मिलियन डलर ऋण स्वीकार गर्ने सरकारकाे निर्णय

९ जेठ, काठमाडौं । सरकारले विद्यालय क्षेत्र सुधार कार्यक्रमका लागि विश्व बैंकबाट प्राप्त हुने १२० मिलियन डलर बराबरको सहुलियतपूर्ण ऋण सहायता स्वीकार गरेको छ । 

मंगलबार सिंहदरबारमा बसेको मन्त्रिपरिषद्को बैठकले विद्यालय शिक्षा क्षेत्र आयोजनका लागि शिक्षाका लागि विश्वव्यापी साझेदारी कार्यक्रमबाट प्राप्त हुने १९ दशमलव ७० मिलियन अमेरिकी डलर बराबरको अनुदान सहायता पनि स्वीकार गर्ने समेत निर्णय भएको सरकारका प्रवक्ता एवं संचार तथा सूचना प्रविधि मन्त्री रेखा शर्माले जानकारी दिइन् ।