१६ आरोपीविरुद्ध सरकारी वकिलको कार्यालयले अदालतमा मुद्दा दर्ता गराउँदै

१० जेठ, काठमाडौं । नेपालीलाई नक्कली भुटानी शरणार्थी बनाएर अमेरिका पठाउने भन्दै ठगी गरेको आरोप लागेको १६ जना आरोपीविरुद्ध आज अदालतमा मुद्दा दर्ता गरिदैँछ । मंगलबार नै मुद्दा दर्ता गराउने तयारी गरिएको भए पनि सरकारी वकिलको कार्यालयले अभियोजनको काम नसकिएको भन्दै आज मात्रै काठमाडौं जिल्ला अदालतमा मुद्दा दर्ता गराउन लागेको हो । 

जिल्ला प्रहरी परिसर काठमाडौंले सो प्रकरण माथिको अनुसन्धान प्रतिवेदन सरकारी वकिलको कार्यालयलाई सोमबार नै बुझाइसकेको छ । तर, सो अनुसन्धान प्रतिवेदन माथिको अभियोजनका काममा दुई दिन लागेपछि आज बुधबार मात्र मुद्दा दर्ता गराउन लागिएको सरकारी वकिल कार्यालय प्रमुख एवं सहन्यायाधिवक्ता अच्युतमणि न्यौपानेले जानकारी दिए ।

प्रहरीले प्रतिवेदन बुझाउँदा विशेष गरी तीन वटा कसुरमा मुद्दा लग्नु पर्ने सुझाव सरकारी वकिलको कार्यालयलाई दिइ सकेको छ । ठगी, संगठित अपराध र राज्य विरुद्धको कसुरमा हाललाई १६ जनालाई मुद्दा लगाउन प्रस्ताव गरिएको प्रहरी प्रतिवेदनको पूर्ण अध्ययन गरेर मात्रै बुधबार सरकारी वकिलको कार्यालयले मुद्दा दर्ता गराउन लागेको हो ।

सो प्रकरणमा १४ जनाभन्दा बढी फरार रहेको जनाउँदै उनीहरूलाई जतिसुकै बेला पनि पक्राउ गर्ने गरी प्रहरीले बुझाएको प्रतिवेदनमा टेकेर सरकारी वकिलको कार्यालयले आज मुद्दा दर्ता गराउन लागेको हो ।

सो प्रकरणमा हालसम्म  पूर्व उपप्रधानमन्त्री टोपबहादुर रायमाझी, पुर्व गृहमन्त्री बालकृष्ण खाँण, नेपाल सरकारका सचिव टेकनारायण पाण्डेलगायतका ‘भीआईपी’ सहित १६ जनालाई पक्राउ गरि प्रहरी हिरासतमा राखिएको छ ।  पूर्वगृहमन्त्री रामबहादुर थापा बादलका छोरा प्रतिक थापालगायत १२ जना भने फरार रहेको प्रहरीले जनाएको छ । क्रममाथिको छलफल जारी रहेको छ ।