प्रहरीलाई घुस दिन खोज्ने भारतीय पक्राउ

१० जेठ, काठमाडौं । कैलालीको धनगढी भन्सार छलीको सामान कटाइदिन प्रहरीलाई घुस दिन खोज्ने भारतीय नागरिक पक्राउ परेका छन् ।

बुधबार बिहान धनगढी उपमहानगरपालिका–२ त्रिनगर व्यारल नजिकै भारतबाट भन्सार छलेर ल्याएको आठ हजार रुपैयाँ बराबरको सामान पास गरिदिन आग्रह गर्दै घुस दिन खोज्ने भारतको पलिया बस्ने ५० वर्षीय सुधिर गुप्तालाई पक्राउ गरिएको प्रहरीले जनाएको छ ।

गुप्ताले बुधबार बिहान भारतबाट ल्याएको अवैध सामान भित्र्याउन प्रहरीलाई सामान छाडिदिन भन्दै ५ सय रूपैयाँ लिन भनेपछि पक्राउ गरिएकाे जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) कुलदीप चन्दले बताए । पक्राउ परेका गुप्तालाई बरामद सामानसहित प्रहरीले आजै सार्वजनिक गरेको छ ।

गुप्ताको साथबाट मिठाई, सुपारी, चियापत्ती, पाउडर दूध लगायत बरामद भएको छ । गुप्तालाई आवश्यक कारबाहीका लागि कैलाली भन्सार कार्यालयमा बुझाइएको छ ।