चाहे घर होस् चाहे बार्दलीको होस् सबैमाथि छानबिन हुनुपर्छ : गगन थापा

९ जेठ, काठमाडौं । नेपाली कांग्रेसका महामन्त्री एवं सांसद गगनकुमार थापाले भुटानी शरणार्थी प्रकरणमा जोडिएका सबै जनमाथि अनुसन्धान हुनुपर्ने बताएका छन् ।  

सरकारको नीति तथा कार्यक्रममाथि बुधबार प्रतिनिधिसभा बैठकमा छलफलमा भाग लिँदै महामन्त्री थापाले प्रकरणमा नाम लिइएका सबैमाथि अनुसन्धान गर्न सरकारले खुटटा दह्रो रुपमा टेक्नुपर्ने बताए । उनले एमालेका अध्यक्ष केपी शर्मा ओली, सांसदहरु आरजु राणा, मञ्जु खाणप्रति लक्षित गर्दै ‘घरको होस् कि बार्दलीको होस्, सबैमाथि अनुसन्धान गर्न सरकारले खुटटा कमउन नहुने बताए । 

‘जसको नाम आएपनि त्यसमाथि निष्पक्ष अनुसन्धान हुनुपर्ने उनले बताए । सांसद थापाले भने, ‘अनुसन्धान कसरी भइरहेको छ । सबै जनाले हेरिरहेका छन् । चाहे घर होस् चाहे बार्दलीको होस् । नेता होस् कि नाता होस् । सलामी गर्ने होस् कि सलामी लिने होस् एक जना पनि छुट्न हुँदैन । ससरकारले गरेको अनुसन्धान फेयर हुनुपर्छ । नत्र अवश्य प्रश्न उठ्छ ।’

यस्तै सांसद थापाले सरकारले नीति तथा कार्यक्रम ल्याउने तरिका परिवर्तनबारे पुनर्विचार गर्नुपर्ने बेला आएको बताए । नीति तथा कार्यक्रममाथि जति संशोधन र सुझाव दिएपनि अटाउने वा पुनर्लेखन नहुने नियम भएकाले त्यसमाथि छलफल निकम्म सावित हुने बताए । नीति तथा कार्यक्रम र बजेटलाई एक ठाउँमा मिलाएर ल्याउनेबारे सोच्न उनले उपस्थित सदस्यहरुसँग आग्रह गरे ।

नीति तथा कार्यक्रम सकारात्मक रहेपनि कार्यान्वयनमा सबै एकजुट हुन सके परिणाम प्राप्त हुनसक्ने बताए ।