जलनसम्बन्धी विश्वस्तरका अस्पताल निर्माण गर्ने विषय नीति तथा कार्यक्रममा राखाैं : चन्द्र भण्डारी

१० जेठ, काठमाडौं । नेपाली कांग्रेसका चन्द्रकान्त भण्डारीले विद्यालय तहमा जलनसम्बन्धी विषय राख्नुपर्ने बताएका छन् । गत फागुनमा खाना पकाउने एलपी ग्यासको जलनमा परेर गम्भीर घाइते भएका उनी लामो समेत भारतमा उपचारपछि वैशाखको अन्तिम हप्ता फर्किएका थिए । 

फर्किएपछि सांसद भण्डारी पहिलोपटक बुधबार प्रतिनिधिसभाको बैठकमा सरकारको नीति तथा कार्यक्रममाथि धारणा राख्दै यस्तो बताएका हुन् । धारणा राख्ने क्रममा भावुक बन्न पुगेका उनले बिजुली, ग्यास बाल्ने कसरी र कुन अवस्थामा बाल्ने भन्ने कुराको ज्ञान नहुँदा जलनबाट मृत्यु हुने नागरिकमा आफ्नी आमाको नाम पनि थपिएको बताए ।

आधारभूत तहको पाठ्यक्रममा बिजुली बाल्ने, ग्यास बाल्ने र सडक क्रस गर्ने सम्बन्धी पाठ राख्नुपर्ने उनले बताए । विकास र सडक सुविधासँगै गाउँगाउँसम्म पनि बिजुली र ग्यास सिलिन्डर पुगेको र तर ज्ञानकै अभावमा प्रयाेगका क्रममा  धेरै उपभोक्ताको ज्यान जाने गरिएको उनले बताए ।

साथै भण्डारीले नेपालमा विश्वस्तरका एउटा जलनसम्बन्धी अस्पताल बनाउने नीति र कार्यक्रम ल्याउन सरकारसँग आग्रह गरे । आफ्नो उपचारमा सहयोग पुर्याउने सरकार, सहयोगीलाई धन्यवाद दिए । 

भण्डारी गत फागुन ३ मा आफ्‍नै निवास बुद्धनगरमा ग्यास लिक भई आगोलागी हुँदा घाइते भएका थिए । घाइते भएकी उनकी आमा हरिकला भण्डारीको भने गत फागुन ४ गते कीर्तिपुरस्थित अस्पतालमा  निधन भएको थियो।