बजेटपछि सरकारमा जाने जनमत पार्टीकाे तयारी

१० जेठ, काठमाडौं । जनमत पार्टी सरकारमा सहभागी हुने तयारीमा लागेको छ । नयाँ आर्थिक वर्षको बजेट संसदमा पेस भएपछि सरकारमा सहभागी हुने तयारी गरेको हो ।

सरकारले यही जेठ १५ गते नयाँ बजेट संसदमा पेस गर्दैछ । पार्टीले बजेटपछि सरकारमा जानेबारे सोचिरहेको जनमत पार्टीका वरिष्ठ उपाध्यक्ष अब्दुल खानले बताए ।

प्रधानमन्त्री प्रचण्डबाट बजेटपछि सरकारमा जानेबारे वातावरण बनाउने आश्वसन दिएको उनले बताए । जनमतले कृषि, उद्योग वा सहरी विकास मन्त्रालयमा दाबी गर्दै आइरहेको छ । दाबीबीच यसअघि प्रधानमन्त्रीले जनमतलाई खानेपानी मन्त्रालय दिएका थिए । जनमतबाट अब्दुल खान मन्त्री बनेपनि उनलाई पार्टीले केही दिनमै सरकारबाट फिर्ता बोलाएको थियो । प्रतिनिधि सभामा जनमत पार्टीका तर्फबाट ६ जना सांसद छन् ।

उपेन्द्र यादव नेतृत्वको जसपाबाट बुधबार एक जना मन्त्री र एक जना राज्यमन्त्रीले शपथ लिएपछि सरकारसँग मन्त्रालय खाली छैन । संवैधानिक व्यवस्थाअनुसार संघीय मन्त्रिपरिषद् २५ सदस्यीयभन्दा बढाउन पाइँदैन । जनमतलाई सरकारमा ल्याउँदा मन्त्रालय खाली गराउनुपर्ने हुन्छ ।