नक्कली भुटानी शरणार्थी प्रकरणमा मुद्दा चलाउने निर्णय, अभियोगपत्र अदालत लगियाे

१० जेठ, काठमाडौं । जिल्ला सरकारी वकिलको कार्यालय काठमाडौंले नक्कली भुटानी शरणार्थी ठगी प्रकरणमा पक्राउ परेकाहरुविरुद्धको अभियोगपत्र जिल्ला अदालतमा पुर्याएको छ । कार्यालयले आज दिउँसो अभियोग पत्र काठमाडौँ जिल्ला अदालत पुर्याएको हो । 

वकिलको कार्यालयले प्रहरीले बुझाएको रायसहितको प्रतिवेदन अध्ययन गरी अभियोजन पत्र तयार गरेको हो । नेपाली नागरिकलाई नक्कली भुटानी शरणार्थी बनाएर अमेरिका पठाउने प्रलोभनमा पारी करोडौंरुपैयाँ ठगी गरेको अभियोगमा १६ जना प्रहरी हिरासतमा छन् । अन्य १७ जना फरार छन् । 

प्रहरीले निजहरुविरुद्ध ठगी, राज्यविरुद्धको अपराध, संगठित अपराध, सरकारी लिखत किर्ते लगायत कसुरमा अुनसन्धान गरेको थियो । ३३ जनाविरुद्ध मुद्दा चलाउनुपर्ने रायत प्रहरीको छ । 

उनीहरुविरुद्ध एक सय १३ जना पीडितले दिएको उजुरीका आधारमा रु २७ करोड ५० लाख बढी ठगी भएको प्रतिवेदन तयार पारिएको छ । 

विभिन्न मितिमा पक्राउ परी हिरासतमा रहनेहरुमा  तत्कालीन गृहमन्त्री बालकृष्ण खाण, नेकपा एमालेका सांसद एवं पूर्वउपप्रधानमन्त्री टोपबहादुर रायमाझी, तत्कालीन गृहसचिव टेकनारायण पाण्डे, भुटानी शरणार्थी नेता टेकनाथ रिजाल, तत्कालीन गृहमन्त्री रामबहादुर थापाका सुरक्षा सल्लाहकार इन्द्रजीत राई, गृह अन्तर्गतका हज समितिका अध्यक्ष शमशेर मियाँ छन् ।

यस्तै, पूर्वसभासद आङटावा शेर्पा, तत्कालीन गृहमन्त्री खाणका स्वकीय नरेन्द्र केसी, सन्दीप रायमाझी, पैसा ठगी गर्ने गिरोहका केशव दुलाल, सानु भण्डारी, सन्देश शर्मा, सागर राई, टंक गुरुङ, गोविन्द चौधरी र रामशरण केसी छन् । 

पूर्वगृहमन्त्री रामबहादुर थापाका छोरा प्रतीक, इन्द्रजित राईका छोरा नीरजसहितका १७ जना अझै फरार छन् । 

प्रकरणमा पैसा लिएको भनिएको सार्वजनिक अडियोमा नाम लिइएका सांसद आरजु राणा, मञ्जु खाणलाई अनुसन्धानका क्रममा बोलाइएनन् ।