बिना आधार प्रहरी महानिरीक्षकलाई विवादमा तान्न खोज्नु आपत्तिजनक विषय होः नेपाल प्रहरी

१० जेठ, काठमाडौं । नेपाल प्रहरीले नेपालीलाई नक्कली भुटानी शरणार्थी बनाएर करोडौं ठगी गरेको प्रकरणसँग जोडेर प्रहरी महानिरीक्षक वसन्त बहादुर कुँवरको भूमिकाबारे कुनै प्रमाणबिना प्रश्न उठाइएको भन्दै आपत्ति प्रकट गरेको छ । प्रहरीले जिम्मेवारी निर्वाह गर्ने सिलसिलामा कसैसँग बोलेको विषयलाई लिएर विवादमा तान्ने प्रयास हुनु उचित नभएको बताएको छ ।  

आज एक विज्ञप्तिमार्फत नेपाल प्रहरीले कुनै आधार, तथ्य र प्रमाणबिना अपराध अनुसन्धानजस्तो संवेदनशील विषयमा सम्प्रेषण गरिएको समाचारले जनमानसमा भ्रम सिर्जना हुन जाने बताएको छ । उसले नेपाल प्रहरी संगठनकै विश्वसनीयता, छवि तथा चेन अफ कमाण्डमा समेत आँच आउने हुँदा उक्त समाचारहरूप्रति नेपाल प्रहरी प्रधान कार्यालयले पूर्ण असहमति प्रकट गरेको जनाएको छ । 

कुनै दुई व्यक्तिले गरेको संवाद कै आधारमा शरणार्थी प्रकरणका आरोपितबाट प्रहरी प्रमुख स्वयंले नै आर्थिक फाइदा लिएको भन्ने अतिशयोक्ति तथ्य स्थापित गर्न खोजी प्रहरी महानिरीक्षकलाई विवादमा तानिनु अत्यन्त निन्दनीय छ, प्रहरीले भनेको छ ।