काभा वुमेन्स भलिबलः ३-१ को सेटमा भारतसँग पराजितसँगै नेपाल सेमिफाइनल प्रवेश

१० जेठ, काठमाडौं । काभा वुमेन्स च्यालेञ्ज कप भलिबलअन्तर्गत समूह चरणको आफ्नो अन्तिम खेलमा नेपाली टिम भारतसँग ३–१ को सेटमा पराजित भएको छ ।

नेपालले फाइनल प्रवेशका लागि दोस्रो सेमिफाइनलमा काजाकस्तानसँग खेल्नुपर्नेछ । नेपाल र काजाकस्तानबीचको खेल शुक्रबार हुनेछ । दुवै टोली यसअघि नै सेमिफाइनलमा पुगिसकेका कारण यो खेलको नतिजाले समूह ‘ए’ को विजेताको टुंगो लगाएको छ ।

सुरुवाती दुई सेट क्रमश: २५–१२ र २६–२४ ले गुमाएको नेपालले तेस्रो सेट २५–२१ ले जितेर खेलमा फर्किने प्रयास गरेको थियो ।

चौथो सेटको आधा समयसम्म प्रतिस्पर्धात्मक भएपनि एक समय नेपालले १८–१५ को अग्रता बनाएर आशा जगाएको थियो । तर, त्यसपछि नेपालले ३ अंकमात्र जोड्दा भारतले १० अंक जोडेर खेल जित्न सफल रह्यो ।