सरकारसँग निजगढ विमानस्थल बनाउने सोच नै छैन : प्रेम आले

१० जेठ, काठमाडौं । सत्ता साझेदार दल नेकपा (एकीकृत समाजवादी)का सांसद प्रेम आलेले सरकारसँग निजगढ अन्तर्राष्ट्रिय विमानस्थल बनाउने सोच नै नरहेको बताएका छन् । 

सरकारले ल्याएको आव २०८०/८१ को नीति तथा कार्यक्रममाथि बुधबार प्रतिनिधिसभाको बैठकका धराणा राख्दै सांसद आलेले सरकारले जति जोड गरेजस्तो देखिएपनि साँचो अर्थमा विमानस्थल बनाउने ठोस योजना नै नरहेको बताएका हुन् । 

उनले आफू पर्यटनमन्त्री छँदा नै थाहा भएको भन्दै सरकारले जतिपनि सरकारले निजगढ विमानस्थल बनाउने कुरा गरेपनि अर्थ मन्त्रालये बजेट नै उप्लब्ध गराउने अनुभव उनले सुनाए । निजगढ विमानस्थल बनाउन कम्तीमा पनि ६ खर्ब लागत लाग्ने उनको भनाइ थियो । 

सरकारले अहिलेको वार्षिक नीति तथा कार्यक्रममा यो विमानस्थल निर्माणको काम सुरु गरिने उल्लेख गरेको छ ।

यस्तै पूर्वमन्त्री समेत रहेका आलेले पशुपति विकास कोषको काठमाडौंमा रहेको जग्गामध्ये ३० रोपनी क्षेत्रलाई सुकुम्बासीको नाममा पूर्जा वितरणको तयारी थालेको भन्दै आपत्ति जनाए । जग्गा वितरण गरिए आफूले जनताको समर्थनमा प्रतिवाद गर्ने चेतावनी दिए ।