नक्कली भुटानी शरणार्थी प्रकरणः शुक्रबारबाट थुनछेक बहस शुरु हुने

११ जेठ, काठमाडौं । पूर्व उपप्रधानमन्त्री, पूर्वगृहमन्त्री लगायत नक्कली भुटानी शरणार्थी प्रकरणमा आरोपितहरुको थुनछेकको बहस शुक्रबारबाट शुरु हुने भएको छ । बिहिबार सार्वजनिक बिदा परेकाले शुक्रबारबाट थुनछेक बहस हुने भएको हो । उनीहरूलाई लाई ५ वटा मुद्दामा काठमाडौं जिल्ला सरकारी वकिल कार्यालयले मुद्दा अभियोजन गरेको छ ।

पक्राउ परेका र फरार सूचीमा रहेकासहित ३० जना प्रतिवादीविरुद्ध ५ वटा कसुर लगाउने गरी मुद्दा अभियोजन भएको हो । फरार सूचीमा रहेका बेचन झा आज मात्रै पक्राउ परेका छन् । उनलाई पनि अब शुक्रवार देखि नै यही मुद्दामा जोडेर थुनछेकमा सहभागी गराइनेछ ।

आरोपितहरु विरुद्ध ठगी, संगठित अपराध, कीर्ते, राज्य विरुद्धको अपराध र एकीकृत कसुरमा सजाय गर्न माग गरिएको छ । ठगीमा बिगो, ७० हजार रूपैयाँसम्म जरिवाना र ७ वर्षसम्म कैद सजाय हुन्छ । यस्तै, संगठित अपराधमा अतिरिक्त ५० प्रतिशत सजाय थप हुन्छ । एकीकृत कसुरमा सबैभन्दा बढी सजाय हुने कसुरको सजाय र त्यसपछिको अधिकतम सजाय हुने अर्को कसुर बापतको सजायको आधा सजाय थप गरि सजाय गर्नुपर्ने कानूनी व्यवस्था छ ।

यस्तै, राष्ट्र हित प्रतिकूल कार्य गर्न नहुने कसुरमा ५ वर्षसम्म कैद र ५० हजार रूपैयाँसम्म जरिवाना हुन्छ । कीर्ते गर्न नहुने कसुरमा ७ वर्षसम्म कैद र ७० हजार रूपैयाँसम्म जरिवाना हुने व्यवस्था छ । सार्वजनिक ओहदामा बसेर भएको अपराधमा अतिरिक्त ५० प्रतिशत सजाय थप हुने कानुनी व्यवस्था छ ।