बयानमा आरोपीलाई पक्राउ गरी अनुसन्धान गर्ने बाटो खुला

११ जेठ, काठमाडौं । सरकारी वकिलको कार्यालयले भूटानी शरणार्थी प्रकरणमा पक्राउ परेका अभियुक्तहरूको बयानमा मुछिएकाहरुलाई पक्राउ गर्ने बाटो खोलिदिएको छ । अख्तियार प्रमुख प्रेमकुमार राई लगायतका व्यक्तिहरूमाथि अनुसन्धान गर्न प्रहरीलाई बाटो खुलेको हो ।

बुधबार साँझ सरकारी वकिल कार्यालयले प्रहरीलाई पत्राचार गर्दै सो बाटो खुला गरेको हो । बुधबार सरकारी वकिल कार्यालय काठमाडौंले जिल्ला अदालत काठमाडौंमा ३० जनाविरूद्ध मुद्दा दर्ता गरेपछि अन्यको हकमा पनि अनुसन्धान गर्न बाटो खुला गरिदिएको हो ।  

सरकारी वकिलले बयानको क्रममा अभियुक्तहरूले बयानमा खुलाएका व्यक्तिहरूको हकमा पनि अनुसन्धान गर्न भनेर जिल्ला प्रहरी परिसर काठमाडौंलाई निर्देशन दिएको हो । ‘हामीले कुनै पनि व्यक्तिको नाम लिएर अनुसन्धान गर्नु भनेका छैनाैं । तर बयानको क्रममा आएका जति सबै व्यक्तिहरूमाथि थप अनुसन्धान गर्नु भनेका छौं,’ प्रमुख सरकारी वकिल एवं सहन्यायाधिवक्ता अच्युतमणि न्यौपानेले भने ।

प्रहरीको अनुसन्धानबाट अख्तियार प्रमुख आयुक्त प्रेमकुमार राई, पूर्वगृहमन्त्री रामबहादुर थापा बादल, उनकी श्रीमती नैनकला थापा, पूर्वप्रधानमन्त्री केपी शर्मा ओलीका प्रमुख स्वकीय सचिव राजेश बज्राचार्य, पूर्व प्रदेश सांसद अजयक्रान्ति शाक्य, विद्यासुन्दर शाक्यका निजी सचिव राजेश्वर स्थापित लगायतलाई अनुसन्धान गर्ने संभावना बढेको छ ।

सरकारी वकिलले यस प्रकरणमा ३० जनाविरूद्ध मुद्दा चलाउनुपर्ने उल्लेख गरेको छ। १६ जना पक्राउ परेका छन् भने बाँकीलाई फरार करार गरेको छ । प्रहरीले यी सबैलाई पक्राउ गरी अनुसन्धान गर्नुपर्ने विषयमा सदनमा समेत कुरा उठिसकेको छ । जसले गर्दा अख्तियार दुरुपयोग अनुसन्धान आयोगका प्रमुख आयुक्त राईलाई नैतिक संकट उत्पन्न भएको छ ।