सिरहामा एमाले कार्यकताद्वारा जातीय विभेदविरुद्धको उजुरीकर्तामाथि आक्रमण

११ जेठ, सिरहा । जिल्लाको भगवानपुर गाउँपालिकामा जातीय विभेदविरुद्ध उजुरी दिने उजुरीकर्तामाथि नेकपा (एमाले)का कार्यकर्ताले आज बिहान सांघातिक आक्रमण गरेका छ ।

एमालेबाट गाउँपालिका अध्यक्ष विजयी उग्रनारायण यादवले छलफलका लागि उजुरीकर्ता विष्णुदेव पासवानलाई बोलाएका थिए । छलफलमा आएका सो गाउँपालिका वडा नं. १ का पसवानलाई अध्यक्षकै योजनामा उनका कार्यकर्ताले आक्रमण गरी सख्त घाइते बनाइदिएका छन् । 

‘भोजको उजुरी हाल्ने मान्छे यही हो’ भन्दै आफूमाथि आक्रमण गरेको घाइते पासवानले बताएका छन् । जातीय रुपमा होच्याउने खालका शब्ल प्रयोग गरेर गालीगलौजपछि कुटपिट गरेको उनले बताए । 

एमालेका गाउँ कमिटीका पदाधिकारी सूर्यनारायणप्रसाद यादव,  नन्दी यादव, घुरण यादव, देवन यादव, जीवछ यादवलगायतले योजनावद्ध रुपमा सार्वजनिक स्थलमा बोलाएर सामूहिक रुपमा घेरा हालेर कुटपिट गरेको उनले बताए । 

पासवानलाई जीवछ साफीले बोलाएर घटनास्थलसम्म ल्याएका थिए ।  ‘पहिला दुई/तीन जना बसेर छलफल गरौं भने, पछिबाट अन्य मानिसहरु आएर एककासि ममाथि आक्रमण गरे’ उनले भने । 

कुटपिटबाट उनको अनुहारसहित शरीरको विभिन्न  भागमा चोटपटक लागेको छ भने ढाडमा गम्भीर चोट पुगेको प्रादेशिक अस्पताल लहानले जनाएको छ। 

भगवानपुर गाउँपालिकाका अध्यक्ष उग्र नारायण यादवले आफ्नी आमाको गएको २२ फागुनमा भएको शुद्धि भोजमा जातीय आधारमा दलित, मुस्लिम र गैरदलित समुदायलाई छुट्टाछुट्टै स्थानमा ब्यानर, प्लेकार्ड नै राखेर भोजको व्यवस्था गरेका थिए । यादवको उक्त कार्यबाट जातीय विभेद भएको र जातीय आधारमा भोज खुवाएको भन्दै सर्वत्र विरोध भएको थियो । 

सोही घटनालाई लिएर पासवानसहितका दलित अगुवाहरुले अध्यक्ष यादव लगायतलाई विभेद कसुरमा कारवाहीका लागि गत चैत १४ गते जिल्ला प्रहरी कार्यालय सिरहामा किटानी जाहेरी दर्ता गराएका थिए । जाहेरीमा साक्षीको बयानको तयारी भइरहेको बेला पासवानमाथि आक्रमण भएको हो । 
। 

घटनाबारे प्रहरीमा खबर आएको र घटनाबारे बुझ्न प्रहरी टोली पठाइसकिएको जिल्ला प्रहरी कार्यालयका प्रवक्ता रवीन्द्र राज पाण्डेले जानकारी दिएका छन् । 

गत वर्ष वैशाख १० मा सम्पन्न स्थानीय तहको चुनावमा गाउँपालिकाको अध्यक्ष र उपाध्यक्षमा एमालेका उम्मेदवार क्रमशः उग्रनारायण र रेखाकुमारी यादव विजयी थिए ।