हरि बुढामगरको विश्वकीर्तिमान आरोहणको क्षेत्रमा प्रेरणादायी : सभामुख घिमिरे

११ जेठ, काठमाडौं । सभामुख देवराज घिमिरेले कृत्रिम खुट्टाको भरमा सगरमाथाको सफल आरोण गरेर हरि बुढामगरले कायम गरेको विश्वकीर्तिमान आरोहणको क्षेत्रमा प्रेरणादायी रहेको बताएका छन् । 

बालुवाटारस्थित सभामुखको सरकारी निवासमा बिहीबार आरोही बुढामगरलाई सम्मान गर्दै सभामुख घिमिरेले बुढामगरले नेपाल र नेपालीलाई विश्वभर चिनाएको भन्दै प्रशंसा गरे । 

‘तपाईं प्रेरणादायी व्यक्तिको सूचीमा विश्वमै कहलिनुभएको छ । तपाईंको प्रेरणाको कथा हरेक बालबालिकासम्म पुर्याउनुपर्छ । नेपालीले तपाईंप्रति गौरव गरिरहनेछन्,’ उनले भने । 

दुवै खुट्टा नभएपनि विश्वको सर्वोच्च शिखर सगरमाथाको सफल आरोहण गरेका बुढामगरलाई सभामुख  घिमिरे र उपसभामुख इन्दिरा रानामगरले सम्मान गरेका छन् । 

उपसभामुख रानाले बुढामगरलाई सर्वश्रेष्ठ मानवको संज्ञा दिँदै आगामी दिनमा पनि आफ्नो यात्रालाई निरन्तरता दिन समेत सुझाव दिइन् । थप सफलता र प्रगतिका लागि उनले शुभकामना दिइन् । 

सन् २०१० मा आफगानिस्तानमा तालिवानले गराएको बम विष्फोटमा बुढामगरको दुवै खुट्टा चुँडिएका थिए । लामो समयको प्रयत्नपछि उनले यही जेठ ५ गते सगरमाथाको चुचुरो चुम्न सफल भएका थिए ।