मधेशमा लोसपालाई वन मन्त्रालय दिएर सरकारमा ल्याइँदै

११ जेठ, जनकपुरधाम । मधेश प्रदेशका मुख्यमन्त्री सरोजकुमार यादवले महन्थ ठाकुर नेतृत्वको लोकतान्त्रिक समाजवादी पार्टी (लोसपा)लाई एउटा मन्त्रालयको जिम्मेवारी दिएको सरकारमा सामेल गराउने भएका छन् । 

मुख्यमन्त्री यादवले लोसपालाई वन मन्त्रालय दिने र आजै सरकारमा सहभागी गराउने भएको जनाइएको छ । यसलाई लोसपाले पनि पुष्टि गरेको छ । लोसपाले पार्टीको मधेश प्रदेशसभा सदस्य रमेशप्रसाद कुर्मीकाे नेतृत्वमा पार्टी सरकारमा सहभागी हुने पार्टीका कार्यकारिणी सदस्य जितेन्द्र सोनलले बताए । 

कुर्मीलाई वन तथा वातावरण मन्त्रालयको जिम्मेवारी दिने सहमति भएको उनले बताए । कुर्मीलाई आज बेलुका ५ बजे शपथ खुवाउने तयारी भएको जनाइएकाे छ । मुख्यमन्त्री यादवले मन्त्रिपरिषद् विस्तार एकलौटी ढंगबाट गरेको भन्दै माओवादी केन्द्र भने मंगलबार नै सरकारबाट बाहिरिइसकेको छ ।

माओवादी केन्द्रले २ वटा मन्त्रालयमा दाबी गरेपनि भूमि व्यवस्था मात्र दिइएको पाएको थियो । त्यसलाई त्यागेर सरकारबाहिर आएको हो । जनमत पार्टी पनि असन्तुष्ट बनेको छ । माओवादी केन्द्रले पनि दुईवटा मन्त्रालय माग गर्दै आएको छ ।