सहकारीको रकम हिनामिनाका आरोपी मेयर देवकुमार एमालेबाट निलम्बित

११ जेठ, काठमाडौं । सहकारीका बचतकर्ताको करोडौं रुपैयाँ हिनामिना गरेको आरोप लागेका बाग्लुङको ढोरपाटन नगरपालिकाका मेयर देवकुमार नेपाली नेकपा (एमाले)ले पार्टीबाट निलम्बनमा परेका छन् । 

एमाले गण्डकी प्रदेश कमिटीको कार्यालय बैठकमार्फत नेपालीलाई निलम्बन गर्ने निर्णय गरेको हो । नेपाली गण्डकी प्रदेश कमिटी सदस्य थिए । उनलाई पार्टीको साधारण सदस्य समेत नरहने गरी हिनामिनाको आरोप निराकरण नभइन्जेलसम्मका लागि निलम्बन गरेको सचिव धनञ्जय दवाडीले बताए ।

बागलुङ र पोखरामा इमेज बचत तथा ऋण सहकारी संस्था चलाएका नेपाली लगायत सहकारीका पदाधिकारीहरुले बचतकर्ताको करिब २ अर्ब हिनामिना गरेको आरोप छ । 

बचत रकम फिर्ता पाउन नसकेपछि बचतकर्ताहरुले प्रशासनमा उजुरी दिएका छन् । त्यसपछि उनी लगायत सबै पदाधिकारी सम्पर्कविहीन छन् । नेपाली आइतबारादेखि मोवाइल स्वीच्ड अफ गरी सम्पर्कविहीन भएका छन् ।

उनीहरु विदेश भाग्न सक्ने जनाउँदै गृहमन्त्रालयले त्रिभुवन अन्तर्राष्ट्रिय विमानस्थललाई पत्र लेखेर विदेश यात्राको अनुमति रोक्का गर्न भनेको छ । सीमा नाकाहरुमा पनि कडाई साथ निगरानी राखिएको प्रहरीले जनाएको छ ।

माअ‍ोवादी पृष्ठभूमिका नेपाली २०७४ को स्थानीय निर्वाचनमा ढोरपाटनको मेयर उम्मेदवार नबनाएपछि एमालेमा लागेका थिए । गत वर्षको वैशाखमा भएको स्थानीय चुनावमा उनी मेयर निर्वाचित भएका थिए । उनको मेयर कार्यकाल यो दोस्रोपटक हो ।