बागमतीमा चल्ने सवारीसाधनको भाडा ५ प्रतिशतले घटाउने निर्णय

११ जेठ, काठमाडौं । बागमती प्रदेश सरकारले अन्तर पालिकामा चल्ने सार्वजनिक सवारीका साधनको भाडा घटाएको  छ । सवारीमा लाग्ने भाडाको ५ प्रतिशत भाडा घटाइएको बागमती प्रदेशको श्रम रोजगार तथा यातायात मन्त्रालयका सचिव अस्मान तामाङले बताए । 

पेट्रोलियम पदार्थको मूल्य घटेपनि बागमती प्रदेशभित्र अन्तर पालिकामा चल्ने सार्वजनिक सवारीका साधनको भाडा समायोजन नगरेको भन्दै आलोचना भइरहेको बेला प्रदेश सरकारले भाडा घटाएको हो । 

प्रदेशको श्रम, रोजगार तथा यातायात मन्त्रालयले करिब ५ प्रतिशतका दरले प्रदेशभित्र अन्तर स्थानीय तह चल्ने सार्वजनिक सवारीको साधनको भाडा दर घटाएको जनाइएको छ ।

उपत्यकाभित्र सञ्चालन हुने सिटी बसमा साविकको भाडामा बिहीबारबाट लागू हुने गरी ५‍.९० प्रतिशतले घट्नेछ । बागमती प्रदेशभित्र अन्तर पालिका चल्ने मालवाहक सवारीका साधनमा ५.६९ र यात्रुवाहक बसमा ४.१८ प्रतिशतले भाडा दर घटाउने निर्णय मन्त्रालयले गरेको छ ।

यातायात व्यवस्था विभागले यसअघि नै यात्रुबाहक बस, तराई र पहाडी भेगमा चल्ने मलबाहक सवारीको नयाँ भाडा दर घटाइसकेको छ । सकारले प्रतिलिटर १६५ रुपैयाँ रहेको डिजेलको मूल्य १५५ मा झारेको छ ।