रूकुम जिप दुर्घटना : ब्रेक फेलपछि भीरबाट खसेको चालकको भनाइ

११ जेठ, काठमाडौं । बिहीबार बिहान रूकुम पश्चिको बाँफिकोट-८ स्थित दुलीमा भएको जिप दुर्घटना ब्रेक फेल भएका कारण भएको खुलेको छ । घाइते अवस्थामा उपचाररत चालक दीपक बाँठामगरले सो कुरा बताएका हुन् । 

जिप दुलीको मोतिखोलानजिक सडकबाट करिब ४ सय मिटर तल खसेको थियो । खस्दा २२ दिनकी सुत्केरी र उनका नवजात शिशुसहित ५ जनाको ज्यान गएको थियो । खुट्टा भाँचिएका चालक मगरको जिल्ला अस्पताल सल्लेमा उपचार भइरहेको छ । अन्य ५ जनाको पनि सोही अस्पतालमा उपचार भइरहेको छ ।

‘पानी परेर सडक चिप्लो भएको र ब्रेक नलाग्दा ८ मा लु १ ज १७४७ नम्बरको जिप दुर्घटनाग्रस्त हुन पुगेको घाइते चालकले बताएको प्रहरीले जनाएको छ । 

दुर्घटनामा सानीभेरी गाउँपालिका–५ का ४८ वर्षीय देउचन खत्री, सोही वडाका ७० वर्षीय कर्णबहादुर बाँठा, सोही वडाकी २३ वर्षीया शीतल कुसारीको मृत्यु भएको छ । 

त्यस्तै बाँफिकोट गाउँपालिका ८ की २२ वर्षीया रेखा खनाल केसी र उनका २२ दिनका छोरा रोशन केसीको पनि दुर्घटनामा ज्यान गएको छ । अन्य १० जना घाइते भएका छन् । घाइतेमध्ये गम्भीर अवस्थाका ४ जनालाई नेपाली सेनाको हेलिकोप्टरबाट बाँकेको नेपालगञ्ज लगेर उपचार गराइरहेको छ । 

सानीभेरी गाउँपालिका–५ का  २ वर्षीया प्रसिद्ध कुसारी, २० वर्षीया अनिता केसी, २२ वर्षीय ललित बाँठा र जिप धनी ४० वर्षीय प्रेम बाँठा मगरलाई नेपालगन्ज लगिएको हो । प्रसिद्ध कुसारी मृतक शीतलकी पुत्र हुन् ।
सल्लेमा उपचार गराइरहेकामा सानीभेरी–५ कै ४६ वर्षीय कर्णवीर पुन, ४६ वर्षीय गम्भीर कुसारी, १७ वर्षीया मनिषा बस्नेत, १७ वर्षीया रिता खत्री, २१ बर्षीया कल्पना केसी र जीप चालक छन् । जिप क्षतिग्रष्त भएको छ ।