नक्कली भुटानी शरणार्थी प्रकरणः थुनछेक बहस १५ दिन चल्ने अनुमान

११ जेठ, काठमाडौं । नक्कली भुटानी शरणार्थी प्रकरणका पक्राउ परेका १६ जना सहित ३० प्रतिवादीको थुनछेक बहस सकिन कम्तीमा १५ लाग्ने अनुमान गरिएको छ । उनीहरूविरूद्ध बुधबार काठमाडाैं जिल्ला अदालतमा मुद्दा दर्ता भएकाे हाे ।

प्रतिवादी सबैलाई ठगी, संगठित अपराध, कीर्ते र राज्यविरुद्धको अपराध कसुरमा मुद्दा चलाएको छ । 
इजालसमा प्रतिवादीको बयान लिने काम शुक्रबार सुरु हुने भनिएको छ । सरकारको तर्फबाट आधा दर्जन वकिलले बहस गर्ने तयारी रहेको छ । प्रतिवादीहरुको तर्फबाट ४० भन्दा बढी वकिलले बहस गर्ने अनुमान गरिएको छ । 

शुक्रबार गोला प्रणालीबाट थुनछेक प्रयोजनका लागि पेसी तोकिने  जिल्ला सरकारी वकिल कार्यालयका प्रमुख सहन्यायाधिवक्ता नेउपानेले बताए । पेसी तोकिएकै न्यायाधीशको इजलासमा प्रतिवादीहरुको बयान हुने उनले बताए । छुट्टाछुट्टै बयान लिने र बयान प्रमाणित गर्ने तथा मुद्दाका पक्ष र विपक्षका वकिलको बहस पूरा हुन समय लाग्ने उनले बताए । 

प्रतिवादीहरूको बयानका क्रममा पत्रकार वा अन्य सरोकारवालालाई प्रवेश अनुमति नदिइने भएको छ । बहसका बेला पनि भीड हुने भएका कारण अनुमति नमिल्ने संभावना रहेको छ ।

नेपाली नागरिकलाई भुटानी शरणार्थी बनाएर अमेरिका उडाउने सपना बाँडेर सयौं जनाबाट करोडौं रुपैयाँ उठाएर संगठित रुपमा ठगी र राज्यविरुद्ध अपराध गरेको अभियोग प्रतिवादीमाथि छ । मुद्दामा उनीहरुबाट २८ करोड रुपैयाँ बिगोदाबी र ४ वटा कसुरमा गरी २० वर्षभन्दा बढी कैदसजायको माग गरेको छ ।

नेपाली कांग्रेसका नेता एवं तत्कालीन गृहमन्त्री बालकृष्ण खाण, एमाले सांसद एवं पूर्वउपप्रधानमन्त्री टोपबहादुर रायमाझी, सरकारका सचिव टेकनारायण पाण्डे लगायत १६ जना हिरासतमा छन् । बाँकी १४ जना फरार छन् । उनीहरुको खोजी भइरहेको प्रहरीले जनाएको छ । अन्य ३ जनालाई फरार सूचीमा राखिएको छ । उनीहरुको ठेगाना पत्ता नलागेका कारण मुद्दा चलाउन नसकेको हो ।