नक्कली शरणार्थी सम्बन्धी मुद्दाको पेशी न्यायाधीश न्यौपानेको इजलाशमा, सुरुमा दुलालको बयान लिने तयारी

१२ जेठ, काठमाडौं । नक्कली भुटानी शरणार्थी प्रकरणसम्बन्धी मुद्दाको पेशी न्यायाधीश प्रेमप्रसाद न्यौपानेको इजलाशमा परेको छ । सुरुमा इजलाशसामु अभियुक्त केशव दुलालको बयान लिने तयारी भएको छ । दुलाललाई प्रकरणको मुख्य योजनाकार अन्तर्गत राखिएको छ ।

नेपाली नागरिकलाई भुटानी शरणार्थी बनाएर अमेरिका उडाउने षडयन्त्रमा उनीहरूबाट करोडौं रूपैयाँ असुलेर ठगी गरेको लगायत मुद्दामा पूर्वगृहमन्त्री बालकृष्ण खाँण, पूर्व उपप्रधानमन्त्री टोपबहादुर रायमाझी, नेपाल सरकारका बहालवाला सचिव टेक नारायण पाण्डे लगायतका ३० जनालाई प्रतिवादी बनाएर जिल्ला सरकारी वकिलको कार्यालय काठमाडौंले बुधबार मात्र मुद्दा दायर गरेको थियो ।

प्रकरणमा  १६ जना पक्राउ परेका छन् भने १४ जना फरार छन् । उनीहरुविरुद्ध ठगी, किर्ते, राज्यबिरुद्ध अपराध र संगठित अपराध कसुरमा मुद्दा चलाइएको छ । 

मुद्दामा थुकछेक बहसका लागि आजबाट न्यायाधीश समक्ष अदालतका कर्मचारीबाट अभियुक्तहरूको पुन बयान लिइनेछ । थुनछेक बहस सकिन कम्तीमा १५ दिन लाग्ने अनुमान गरिएको छ । बयान लिने बेला पत्रकारलाई प्रवेश नदिइने भएको छ ।