पशुपतिको जलहारी विषयमा प्रतिनिधिसभा बैठकमा जुहारी, एमाले सांसदहरुद्वारा वेल घेराउ

१२ जेठ, काठमाडौं । प्रतिनिधिसभाको बैठकलाई प्रमुख प्रतिपक्षी दल नेकपा (एमाले)का सांसदहरुले अवरोध गरेका छन् । बैठकमा बोल्ने सत्ता पक्षका सांसद लेखनाथ दाहालले यही जेठ १० गतेकाे बैठकमा रोष्ट्रमबाट बाेल्दै पशुपतिनाथ मन्दिरमा सुनको जलहारीको नाममा पित्तलको जलहरी राखेर भ्रष्टाचार गरेको बताएपछि एमालेको संसदीय दल नेता केपी शर्मा ओलीसहित सबै सांसदहरुले आसनबाट उठेर विराेध गरेका छन् ।

एमालेमाथिकाे आराेप झुटा भएकाे भन्दै अभिव्यक्ति फिर्ताकाे माग गर्दै  वेल घेराउ गरेका छन् । जलहारीको गुणस्तरमाथि सरकार पक्षका सांसदले प्रश्न उठाउँदै भ्रष्टाचार भएको विषय उठाएपछि बैठकमा जुहारी नै चलेको छ ।

सभामुख देवराज घिमिरेले आरोप लगाउने सांसद हितराज पाण्डेलाई आफ्नो प्रष्टीकरण राख्न लगाएका छन् । पाण्डेले सरकारले मुलुकका सबैखाले भ्रष्टाचारकाे गम्भीर रुपमा छानबिन गरिरहेको बताए । 

पाण्डेको प्रतिक्रियापछि सभामुख घिमिरेले बैठकमा उठेको प्रश्न बैठकमै छलफल गरेर अगाडि जान सकिने भन्दै आ–आफना आसनमा गएर बस्न आग्रह गरेका थिए । तैपनि नाराबाजीसहित वेल घेराउ कार्यलाई जारी राखेपछि सभामुख घिमिरेले २० मिनेटका लागि बैठक स्थगित गरेका छन् ।

एमाले संसदीय दलका उपनेता सुवास चन्द्र नेम्वाङले गम्भीर आरोप खेपेर बैठक सुचारु गर्न दिनु प्रतिपक्षको धर्मले नदिने बताए । प्रमुख सेचतक पदम गिरीले आधारहीन आरोपको निराकरण नभएसम्म संसद चल्न नदिने चेतावनी दिँदै नाराबाजी र घेराउ गर्न नछाडेपछि बैठक स्थगित गरिएको हो । झुटा अभिव्यक्ति दिनेलाइ माफी माग्न लगाउनुपर्ने एमाले सांसदहरूकाे माग छ ।

जलहरी तत्कालीन सरकारको नेतृत्व गर्ने ओलीको पालामा पुरानो हटाएर नयाँ राखिएको थियो । जलहरीको उद्घाटन एमालेबाट राष्ट्रपति बनेकी तत्कालीन राष्ट्रपति विद्यादेवी भण्डारीले गरेकी थिइन् ।