नक्कली भुटानी शरणार्थी मुद्दामा अदालतमा अभियुक्तको बयान सुरु

१२ जेठ, काठमाडौं । नेपालीलाई भुटानी शरणार्थी बनाएर अमेरिका पठाउने भन्दै करोडौं रकम अलसुलेर ठगी गरी संगठित अपराध गरेको आरोपमा पक्राउ परेकाहरुमाथि काठमाडौं जिल्ला अदालतमा बयान सुरु भएको छ ।
काठमाडौं जिल्ला अदालतका न्यायाधीश प्रेमप्रसाद न्यौपानेको इजलासमा केहीबेर अघिबाट मुख्य योजनाकारको रुपमा चित्रित गरिएका केशव दुलाल र सागर राईको बयान सुरु भएको हो ।

यो प्रकरणमा मुछिएका ३० जनाविरुद्ध बुधबार ठगी, किर्ते लगायतको अभियोगमा मुद्दा दायर भएको थियो । १४ जना फरार छन् । अन्य ३ जनालाई ठेगाना पत्ता नलागेकाले मुद्दा चलाउन नसकेको प्रहरीले जनाएको छ । 

अभियुक्तहरु दुलाल, राईसहित पूर्वगृहमन्त्री बालकृष्ण खाण, पूर्व उपप्रधानमन्त्री टोपबहादुर रायमाझी, नेपाल सरकारका बहालवाला सचिव टेक नारायण पाण्डे लगायत छन् । उनीहरुविरुद्ध प्रहरी अनुसन्धानको प्रतिवेदनसहित रायको आधारमा जिल्ला सरकारी वकिलको कार्यालय काठमाडौंले बुधबार मुद्दा दर्ता गरेको हो ।