एमाले आक्राेशित हुने गरी जलहरीबारे के भनेका थिए सांसद लेखनाथले ?

१२ जैठ, काठमाडौं । शुक्रबार प्रतिनिधिसभाको बैठक प्रमुख प्रतिपक्ष नेकपा (एमाले)ले अवरुद्ध पारेको छ । सरकारको नेतृत्व गरिरहेको नेकपा (माओवादी केन्द्र)का सांसदले आफूमाथि पशुपतिनाथ मन्दिरमा रहेको जलहारीबारे संसद बैठकमै झुटा आरोप लगाएको र गम्भीर चिन्ताको विषय बनेको भन्दै आरोप फिर्ता लिन र आरोप लगाउनेलाई मार्फ माग्न लगाउन माग गर्दै बैठक अवरुद्ध पारेको हो । 

सभामुख देवराज घिमिरेले बैठक सुरु हुने जानकारी दिनसाथ एमालेका संसदीय दलका नेता समेत रहेका अध्यक्ष केपी शर्मा ओलीलगायत सबै कुर्सीबाट उठेर विरोध जनाएका थिए । तैपनि सभामुख घिमिरेले एमालेका सांसदहरुले उठाएको विषयप्रति आफ्नो ध्यानाकर्षण भएको र बस्न पटकपटक आग्रह गरेपनि आरोपीलाई माफी नमगाएसम्म बैठक चल्न नदिने अडान राखेपछि बैठक स्थगित भएको छ । २० मिनेटका स्थगित गरिएको भनिएको बैठक झण्डै एक घण्टा बित्दा पनि सुरु हुन सकेको छैन । 

एमालेले बैठक नै अवरुद्ध गर्नूपर्ने गरी सांसद लेखनाथले संसदमा के भनेका थिए ? यसलाई हेर्नुपर्ने भएको छ । यही जेठ १० गते बसेको बैठकमा सिन्धुली २ बाट प्रतिनिधित्व गरिरहेका सांसद दाहालले एमाले अध्यक्ष ओलीले आफ्नो सरकारको पालमा पशुपतिनाथ मन्दिरको शिव लिंग राखिने जलहारी सुनको भनेर पित्तलको राखेर भ्रष्टाचार गरेको अभिव्यक्ति दिएका थिए । उनले ओलीकै पालामा वैदेशिक ऋण ७ खर्बबाट बढेर १७ खर्ब पुगेको बताएका थिए । यति, ओम्नी काण्ड ओलीकै पालामा भएको धारणा राखेका थिए ।

उनले ओलीलाई भनेका थिए,  ‘उहाँ ३ वर्ष सरकारमा हुँदा ७ खर्ब ऋण थियो भने सरकार छोड्दा १७ खर्ब ऋण कसरी पुग्यो ? यो सरकारले भ्रष्टाचार नियन्त्रण गर्न सक्दैन भन्दा उहाँ सरकारमा छँदा कति भ्रष्टाचार काण्ड आए । यति, ओम्नी, वाइडबडी, स्वास्थ्य सामग्रीको २ अर्बको भष्टाचार । त्यतिमात्र हैन पशुपतिनाथमा जलहरी लगाउँदा पनि सुन भनेर पित्तल लगाइदिएको जस्ता सयौँ यस्ता भ्रष्टाचारका काण्ड छन् । तर अहिलेको सरकारले भ्रष्टाचारविरुद्ध धेरै राम्रो गर्दैछ । सत्य कुरा यो हो ।’

शुक्रबारकाे बैठकमा विराेधमा ल घेराउ गरेकाे उत्रिएका एमालेले आरोप निराकरण नभएसम्म संसद बैठक चल्न नदिने अडान राखेकाे छ ।

ओलीकै प्रधानमन्त्रीकालमा नेपाली नागरिकलाई भुटानी शरणार्थी बनाएर अमेरिका पठाउने भनी सर्वसाधारणसँग करोडौं रुपैयाँ उठाएर राज्यविरुद्ध अपराध गरेको भनिएको प्रकरण मुद्दामा एमालेका सांसद टोपबहादुर रायमाझी अहिले प्रहरी हिरासतमा छन् । उनीसहित ३० जनाविरुद्ध २८ करोड रुपैयाँभन्दा बढी बिगोदाबीसहित काठमाडौं जिल्ला अदालतमा मुद्दा चलिरहेको छ ।

प्रकरणमा ओलीमाथि पनि अनुसन्धान हुनुपर्ने माग सांसदहरूले संसद बैठकमै उठाइरहेका छन् ।