राष्ट्रपतिसमक्ष नागरिकता विधेयक प्रमाणीकरणका लागि पठाउने सरकारको निर्णय

१२ जेठ, काठमाडौं । सरकारले नागरिकता विधेयक प्रमाणीकरणका लागि राष्ट्रपति रामचन्द्र पौडेल समक्ष पठाउने निर्णय गरेको छ । शुक्रबार बसेको मन्त्रिपरिषद बैठकले यसअघि प्रमाणीकरण नभएको विधेयक पुनः प्रमाणीकरणका लागि पठाउने निर्णय गरेको हो ।  

नागरिकता विधेयक प्रमाणीकरणका लागि राष्ट्रपतिलाई अनुरोध गरेर पठाउने निर्णयका लागि प्रधानमन्त्रीले मन्त्रिपरिषदको आकस्मिक बैठक बोलाएका थिए । सत्ता गठबन्धनले नागरिकता विधेयक अघि बढाउन राष्ट्रपतिलाई आग्रह गर्ने निर्णय गरेको थियो । गठबन्धनले निर्णय गरेपछि राष्ट्रपति रामचन्द्र पौडेलले शीतलनिवासमा कानुनविद्हरुसँग आवश्यक परामर्श गरेका थिए । 

राष्ट्रपति पौडेलले सत्ता गठबन्धन दलका नेताहरूलाई  शीतलनिवास बोलाएर पनि यस विषयमा छलफल गरेका थिए । शुक्रबार सोही अनुसार मन्त्रिपरिषदले दुवै संसदले दुई पटक पारित गरिसकेको विधेयक प्रमाणीकरणका लागि शीतलनिवास पठाउने निर्णय गरेको हो । संसदमा नलगी पठाइएको विधेयक राष्ट्रपतिले प्रमाणीकरण गर्न मिल्ने कि नमिल्ने भन्नेमा विवाद भने कायमै छ ।