कोशीमा पहिचानवादी आन्दोलनका अगुवा समेत गिरफ्तार

१४ जेठ, मोरङ । कोशी खारेज गरी पहिचानको आधारमा नामाकरण हुनुपर्ने माग राख्दै आन्दोलनमा उत्रिएका पहिचानवादीहरुमाथि प्रहरीले सोमबार धरपकड चलाएको छ । प्रहरीले पहिचनवादी आन्दोलनका अगुवाहरुसमेत गिरफ्तार गरेको ।

पहिचानको आधार नामाकरणको माग गर्दै आन्दोलनका सशक्त भूमिका निभाउँदै आइरहेको किरात राई समूदायका किरात राई यायोख्खाका केन्द्रीय अध्यक्ष जीवन हताजु राई गिरफ्तार भएका छन् । प्रहरीले उनलाई विराटनगरको देवकोटा चौकमा रहेको एक होटेलमा चिया खाएर बाहिर निस्किने क्रममा गिरफ्तार गरेको हो । राईसहित सोमबार पक्राउ पर्नेहरुको संख्या ३० पुगेको छ । 

गएको पुष १७ गते कोशी प्रदेशसभाको बहुमत सदस्यहरुको मतदानबाट प्रदेशको नाम कोशी राखेपछि यहाँका राई, लिम्बू, किरातलगायत विभिन्न समूदायले पहिचानको आधारमा नाम राख्नुपर्ने माग सारेर आन्दोलन गर्दै आइरहेका छन् । आन्दोलनका क्रममा गएको फागुनमा आन्दोलनकारी पदमबहादुर लिम्बुको ज्यान गएको छ । उनलाई सरकारले शहीद घोषणा गरिसकेको छ ।

प्रदेशसभाको बेजट बैठक सोमबार बस्दैछ । सोही अवसरमा उनीहरु विरोधमा उत्रिएका हुन् । बैठक आज दिउँसो २ बजे प्रदेशसभा बैठक बस्दैछ । आन्दोलनकारीले आन्दोलनलाई चोक, बजारमा जारी राखेका छन् । 
अहिले विराटनगर क्षेत्रमा सुरक्षा व्यवसथा कडा पारिएको छ । प्रदेशसभा परिसर, मुख्यमन्त्री तथा मन्त्री परिषद्को कार्यालय अगाडि र आसपासको क्षेत्रमा जिल्ला प्रशासन कार्यालयले निषेधाज्ञा जारी गरेको छ ।