पर्सा स्ट्राइकरले जित्यो वीरगञ्ज सुपर लिगको उपाधी

१४ जेठ, वीरगञ्ज । नारायणी क्रिकेट रंगशालामा सम्पन्न वीरगञ्ज सुपर लिग क्रिकेट प्रतियोगिताको उपाधी पर्सा स्ट्राइकरले हात पारेको छ । पर्सा राइडरलाई ६४ रनले पराजित गर्दै पर्सा स्ट्राइकरले उपाधी चुमेको हो । 

टस जितेर पहिलो ब्याटिङ गरेको पर्सा स्ट्राइकरले निर्धारित २० ओभरमा ९ विकेट गुमाएर १५५ बनाएको थियो । १५६ रनको लक्ष्यका साथ मैदान उत्रिएको पर्सा राइडर १५ ओभर २ बलमै अलआउट हुँदै ९१ रनमै समेटिएपछि ६४ रनले पर्सा स्ट्राइकर विजयी भएको हो । 

वीरगञ्ज युथ स्पोर्ट्स एकेडेमीको आयोजनामा गएको मंगलबारदेखि सुरु भएको प्रतियोगितामा वीरगञ्जका विभिन्न ६ वटा टिमले सहभागिता जनाएको आयोजक समितिका हासिम अंसारीले जानकारी दिए ।