संस्थागत भ्रष्टाचारले मुलुकको अर्थतन्त्र थिलथिलो भएको छः प्रधानमन्त्री

१४ जेठ, काठमाडौं । प्रधानमन्त्री पुष्पकमल दाहाल प्रचण्डले संस्थागत भ्रष्टाचारका कारण मुलुकको अर्थतन्त्र थिलथिलो अवस्थामा पुगेको बताएका छन् । उनले संस्थागत र नीतिगत भ्रष्टाचारलाई निर्मूल नबनाएसम्म मुलुकको अर्थतन्त्रले सहि रुपमा गति लिन नसक्ने बताएका छन् ।
 
नेपाल राष्ट्रिय प्राध्यापक सङ्गठनको प्रथम राष्ट्रिय महाधिवेशनको उद्‍घाटन गर्दै उनले मुलुकको अर्थतन्त्र संस्थागत भ्रष्टाचारले थिलथिलो बनेको र भ्रष्टाचार मुक्त सुशासन जनताको अपेक्षा रहेको बताए । प्रधानमन्त्रीले सरकार भर्खरै पारित गरेको नीति तथा कार्यक्रम अनुसारको बजेट निर्माणमा लागेको जानकारी दिए। 

अनुसन्धानमा आधारित मौलिक उच्चशिक्षाको आवश्यकता रहेको बताए । प्राज्ञिक क्षेत्रमा विकास र रुपान्तरणका सैद्धान्तिक र दार्शनिक पक्षको चर्चा गर्न आवश्यक रहेको भन्दै विश्वका कतिपय अनुभव, सिद्धान्त र दर्शनलाई नेपाल सुहाउँदो विकास र परिवर्तनको मोडेलको खोजीका लागि विश्वविद्यालय तहमा अनुसन्धान जरुरी रहेको बताए । 

उनले रोजगारी र स्वरोजगारीको एउटा मुख्य क्षेत्र सूचना प्रविधि बनिरहेको अवस्थामा हाम्रा विश्वविद्यालयका पाठ्यक्रम र पठनपाठन सूचना प्रविधिमा आधारित हुँदा मात्रै यस युग सुहाउँदो बनाउन सकिने बताए । देशमा व्याप्त संस्थागत भ्रष्टाचारले आर्थिक क्षेत्र थिलथिलो परेको बताउँदै सरकार भ्रष्टाचार निर्मुल गर्दै सुशासन कायम गर्न लागिपरेको प्रधानमन्त्रीको भनाइ छ । प्रधानमन्त्रीले मुलुकमा सुशासन कायम गर्न भ्रष्टाचार निर्मूल पार्न प्राध्यापक तथा शैक्षिक क्षेत्रको साथ महत्वपूर्ण हुने उल्लेख गरे । 
 

उच्चस्तरीय शिक्षा आयोग गठन गरेर शिक्षा क्षेत्रका तमाम समस्यालाई समाधान गर्नुपर्ने उनले बताए । जटिल परिस्थितिका बीच नीति तथा कार्यक्रम पारित गरेको बताउँदै प्रधानमन्त्री प्रचण्डले नीति तथा कार्यक्रम अनुसार कै बजेट ल्याउने तयारीमा सरकार लागेको बताए। 

उनले भने,‘निकै ठूलो जटिलताका बीच सरकारले नीति तथा कार्यक्रम पारित गरेको छ । नीति तथा कार्यक्रम अनुसार कै बजेट होस् भन्नेमा सरकार लागेको छ । अहिले मुख्यतः सात सय ५३ वटै पालिकामा कृषि उत्पादनमा वृद्धि गर्ने, युवालाई रोजगार दिने क्रान्तिकारी कार्यक्रम ल्याउने तयारीमा छौँ ।’ 

जेठ १७ गते भारत भ्रमणमा जान लागेको जानकारी दिँदै प्रधानमन्त्रीले यस पटकको भारत भ्रमण विशिष्ट र राष्ट्रिय हितलाई महत्व दिने खालको हुनेमा विश्वास व्यक्त गरे । भ्रमणका क्रममा सन् २०१९ देखि रोकिएको व्यापार पारवहनसम्बन्धी सन्धि खुलाउने प्रयास हुने, हवाई रुट थप्ने विषयमा ब्रेक थ्रु गर्ने, वर्षौंदेखि रोकिएको पञ्चेश्वर बहुद्देश्यीय परियोजनालाई सुरु गर्ने, सीमा समस्या सम्बोधन गर्ने गरी सरकारले तयारी गरेको बताए। साथै, नेपालको अहितमा कुनै सम्झौता तथा सहमति नगर्ने प्रतिवद्धतासमेत उनले व्यक्त गरे ।