सरकारकाे आर्थिक सर्वेक्षण: २०२६ मा नेपाललाई विकासशील मलुकको श्रेणीमा पुर्याइने

१४ जेठ, काठमाडौं । सरकारले चालू आर्थिक वर्षको समीक्षा सहित आर्थिक सर्वेक्षण आइतबार सार्वजनिक गरेको छ । प्रतिनिधिसभाको बैठकमा अर्थमन्त्री डा. प्रकाशशरण महतले आर्थिक सर्वेक्षण सार्वजनिक गरेका हुन् ।

सर्वेक्षणले अर्थतन्त्र सुधार हुँदै गएको देखाएको छ । चालु आर्थिक वर्षमा निर्माण, उत्पादनमूलक उद्योग र थोक तथा खुद्रा व्यापार क्षेत्रको उत्पादन सङ्कुचन हुने अनुमान गरिएको छ । यातायात तथा भण्डारण क्षेत्र, शिक्षा र मानव स्वास्थ्य तथा सामाजिक कार्य क्षेत्रको उत्पादनको वृद्धिदर घट्ने अनुमान सर्वेक्षणमा गरिएको छ । 

आर्थिक वर्ष २०७९/८० मा नेपालको आर्थिक वृद्धि आधारभूत मूल्यमा २.१६ प्रतिशत हुने सरकारको अनुमान छ । ऊर्जा उत्पादनमा वृद्धि भएको कारण विद्युत्, ग्यास, वाष्प र वातानुकुलित क्षेत्रको उत्पादन भने १९.० प्रतिशतले विस्तार हुने अनुमान सरकारको छ । गत आर्थिक वर्षमा नेपालको आर्थिक वृद्धि आधारभूत मूल्यमा ५.२६ प्रतिशत कायम भएको थियो । 

यस्तै, वैदेशिक सहायता परिचालनमा कमी आउने जनाइएको छ । साथै दीर्घकालीन विकास लक्ष्यअन्तर्गत नेपाललाई सन् २०२६ सम्ममा अति कम विकसत मुलुकबाट उठाएर विकासशील मुलुकको सूचीमा पुर्याउने भनिएको छ ।