मुख्यमन्त्री जमकट्टेलले प्रदेश प्रमुखलाई वाचन गर्न दिएका नीति तथा कार्यक्रमकाे फाइल नै खाली

१४ जेठ, हेटौंडा । वाग्मती प्रदेश सरकारले आज आगामी आर्थिक वर्ष २०८०/०८१ को नीति तथा कार्यक्रम ल्याएको छ । बजेट अधिवेशन अन्तर्गत आजको प्रदेशसभको बैठकमा प्रदेश प्रमुख यादवचन्द्र शर्माले प्रदेश सरकारको नीति तथा कार्यक्रम वाचन गरेका थिए ।

वाचनका लागि मुख्यमन्त्री शालिकराम जमकट्टेलले दिएका फाइल नै खाली भेटिएपछि बैठकमा केहीबेर मौनता छाएको थियो । वाचनका लागि भनेर सभामुखले प्रमुख शर्मालाइ फाइल दिन मुख्यमन्त्री जमकट्टेलाई अनुमति दिएपछि उनले रातो फाइल रोष्ट्रममा लगेर दिए । प्राप्त फाइललाई शर्माले खोलेर पढन खोज्दा फाइल नै खाली भेटियाे । शर्मा केही अलमलिए । 

यसरी अलमलमा परेका शर्माले जमकट्टेलाई उक्त फाइल देखाए । त्यसपछि जमकट्टेलले आफूसँग रहेको फोटोकपी दिए । शर्माले त्यसैलाई रातो फाइलमा राखेर पढ्न थाले । त्यसको केही मिनेटमै कर्मचारीले सक्कल कपी ल्याएर दिएका थिए । 

प्रतिपक्षी एमाले र नेमकिपाका सांसदहरुले घटनाप्रति आपत्ति जनाए छ । नेमकिपाका सांसद सुरेन्द्रराज गोसाईले सरकारले चरम लापरवाही भएको बताए । नीति तथा कार्यक्रम पनि सरकारले कमजोर र अव्यवहारिक ल्याएको भन्दै प्रतिपक्ष दलका सांसदहरुले असन्तुष्ट जनाएका छन् ।

मुख्यमन्त्री जमकट्टेलले भने घटना मानवीय त्रुटी भएको भन्दै सामान्यीकरण गर्ने कोशिस गरेका छन् ।