जनकपुरधामका वडाध्यक्ष सहनीलाई कार्वाही गर्न स्थानीयकाे माग

१४ जेठ, काठमाडौं । जनकपुरधाम उपमहानगरपालिका–२४ का वडाध्यक्ष उपेन्द्र सहनीले विकासमा पक्षपात गरेको भन्दै कारवाहीको माग गर्दै स्थानीयले जिल्ला प्रशासन कार्यालयमा धर्ना दिएका छन् । आइतबार बसहियाका सयौं स्थानीयबासीले जिल्ला प्रशासन कार्यालय धनुषा घेराउ  गरेका छन् ।

वडाध्यक्ष सहनीले गत बिहीबार ऐलानी जग्गामा वडाध्यक्ष सहनी धर्मशाला निर्माणको काम सुरु गरेपछि स्थानीयले जातिविशेषको नभई सामुदायिक भवन बनाउनुपर्ने माग गर्दै प्रदर्शन गरेका हुन् । एकलौटी रुपमा काम नगर्न माग गर्दै बिहीबार निर्माणस्थलमै पुगेका स्थानीयमाथि सहनीले कुटपिट समेत गरेका थिए । सोपछि स्थानीय आक्रोशित बनेका हुन् । 

प्रदर्शनकारीहरुले निर्माण कार्य रोक्ने व्यवस्था गर्न माग गर्दै प्रमुख जिल्ला अधिकारी काशीराज दाहाललाई ज्ञापनपत्रसमेत बुझाएका छन् । उनीहरुले आजै जनकपुरधाम उपमहानगरपालिकाका मेयर मनोजकुमार साहलाई ध्यानाकर्षण पत्र पत्र बुझाएका छन् ।

उनीहरूले ‘सार्वजनिक जग्गामा जातीय अतिक्रमण गर्न पाइँदैन’ लेखिएको प्लेकार्ड प्रदर्शन गरे । घेराउ कार्यक्रममा वृद्धवृद्धासमेत सहभागी थिए ।