अर्थमन्त्री महतप्रति सबै क्षेत्रले राखेका छन् राहतको अपेक्षा

१५ जेष्ठ, काठमाडौं । अर्थमन्त्री डा. प्रकाशशरण महतले आज संसदको संयुक्त बैठकमा नयाँ बजेट प्रस्तुत गर्दैछन् । बजेट त्यसै पनि अपेक्षाकृत हुन्छ भने यतिबेला अर्थतन्त्र चलायमान छैन । उद्योग व्यवसायी संकटमा छन् । निजी क्षेत्रले बजेटबाट राहतको आशा गरेको छ । 

निजी क्षेत्रले खास गरी आशा गर्ने भनेको करका दर र आर्थिक नीतिहरूकाे हो । थोरै कर तलमाथि हुँदा व्यवसायी प्रभावित हुन्छ । गत वर्ष करका दरहरूमा व्यापक फेर बदल गरिएको थिए । त्यसको मार अहिले पनि अर्थतन्त्रले भोगिरहेको छ ।  व्यापारीलाई कर घटाए हुन्थ्याे भन्ने छ भने सरकार कसरी राजश्व बढाउने भन्ने चिन्तामा छ । 

समग्रमा आज आउने बजेटप्रति आशावादी नै छन् । अपरान्ह ४ बजे बजेट सार्वजनिक गर्ने कार्यक्रम तय भएको छ । सरकारको नीति तथा कार्यक्रम पारित भइसकेको छ भने आर्थिक सर्वेक्षण पनि सार्वजनिक भएको छ । अब आज आर्थिक वर्ष २०८०–८१ का लागि नयाँ बजेट आउनेछ । जेठ १५ गते बजेट सार्वजनिक गर्नुपर्ने कानुनी व्यवस्था छ । 

स्रोतहरूका अनुसार बजेटमा अर्थमन्त्री महतले साधारण खर्च कटौतीमा जोड दिनेछन् । पुँजीगत खर्च बढाउने, अनावश्यक खर्च कटौती, सार्वजनिक संस्थाहरूको सुधार, मर्जर तथा खारेजीका योजनाहरु समावेश गर्न लागिएको छ । यस्तै, शिथिल अर्थतन्त्रलाई गति दिन केही योजनाहरु पनि अघि सारिएका छन् । 

करिब १७ खर्बको हाराहारीमा रहेर बजेट तय गरिएको जानकारी दिइएको छ । केही पपुलर नारासहितका कार्यक्रमले यसपटक पनि निरन्तरता पाएका छन् । मन्दीमा जान लागेको अर्थतन्त्र सुधारका लागि केही लचिला नीतिहरू पनि सार्वजनिक गरिने छ ।

यता, शेयर बजार र घरजग्गा क्षेत्रका लगानीकर्ताले पनि बजेटबाट राहत अपेक्षा गरिरहेका छन् । शेयर बजारमा पुँजीगत लाभकरको दर घटाउनुपर्ने लगानीकर्ताले माग गरेका छन् । उनीहरूले यसमा लिखित सुझावसमेत दिइसकेका छन् । करको विषय भएकाले यो अहिलेसम्म गोप्य नै रहेको छ । तथापि, लगानीकर्ताहरुले भने आफ्ना अपेक्षा पूरा हुने विश्वास लिएको देखिन्छ ।