पोखराको रत्न मन्दिर आजदेखि सर्वसाधारणका लागि खुला

१५ जेठ, पोखरा । पूर्वराजाहरुले प्रयोग गरेको पोखराको फेवातालनजिक अवस्थित रत्नमन्दिर आजदेखि सर्वसाधारणका लागि खुला गरिएको छ ।

सँस्कृति पर्यटन तथा नागरिक उड्डयनमन्त्री सुदन किराँतीले गणतन्त्र दिवसको दिन फेवाताल निकारमा रहेको रत्नमन्दिर आम नागरिकका लागि खुला गरेका हुन् । आज पहिलो दिन भने निःशुल्क अवलोकनको व्यवस्था मिलाइएको छ । 

रत्न मन्दिर पूर्वराजपरिवारका सदस्य पोखरा आउँदा बसोबास गर्ने ठाउँ हो । तत्कालीन राजा महेन्द्रले यहाँ आउँदा बस्न मिल्ने गरी रानी रत्नको नामबाट दरबार निर्माण गरेका थिए । वि.सं.२०१३ मा राजा महेन्द्रको पालामा यो दरबारको निर्माण सुरु गरिएको थियो । पछि सो दरबार राजा वीरेन्द्रको नाममा आएको थियो । मन्दिर १११ रोपनी क्षेत्रफलमा फैलिएको छ ।

गणतन्त्र स्थापनापछि राजा वीरेन्द्र र राजपरिवारको नाममा भएका सम्पूर्ण सम्पत्ति नेपाल ट्रष्टको नाममा ल्याउने सरकारी निर्णयसँगै यो पनि ट्रष्टको स्वामित्वमा छ । राजसंस्थाको अन्त्यपछि २०६४ मा नेपाल ट्रस्टको स्वामित्वमा आएसँगै उक्त दरबार हालसम्म बन्द थियो ।

मुलुकमा गणतन्त्र स्थापना भएको १५ वर्षपछि खुला भएको रत्न मन्दिरमा अवलोकनका लागि टिकटको व्यवस्था गरिने नेपाल ट्रष्ट सदस्य योङजोम शेर्पाले जानकारी दिइन् । उद्घाटन कार्यक्रममा पोखरा महानगरपालिकाका मेयर धनराज आचार्यलगायत विशिष्ठ व्यक्तिहरुको सहभागिता रहेको थियो ।

राजतन्त्रलाई वंशाणुगत तथा सामन्ती व्यवस्थाको रुपमा चित्रित गर्दै १० वर्षे सशस्त्र विद्रोह र ऐतिहासिक जनआन्दोलनपश्चात २०६५ जेठ १५ गते मुलुकमा अढाइ सय पुरानाे राजतन्त्र अन्त्य र गणतन्त्र स्थापनाको घोषणा गरिएको थियो ।