हरेक नेपालीको भागमा ७१ हजार २ सय ३४ रुपैयाँ ऋण

१५ जेठ, काठमाडौं । सरकारले हरेक वर्ष लिदै आएको आन्तरिक र बाह्य ऋण बढिरहेको छ । सरकारी ऋण जति बढ्दै जान्छ उतैनै हरेक नेपालीको भागमा परेको ऋण पनि बढिरहेको छ । पछिल्ला वर्षमा आन्तरिक ऋणको हिस्सा बढ्दै गएको छ भने बाह्य ऋणको अंश भने क्रमशः घट्दै गएको छ । आर्थिक सर्वेक्षणको गत फागुनसम्म सार्वजनिक ऋण दायित्वमा आन्तरिक ऋणको अनुपात ४८.६ प्रतिशत र बाह्य ऋणको अनुपात ५१.४ प्रतिशत रहेको देखाएको छ । 
 
गत फागुनसम्म सरकारले तिर्न बाँकी सार्वजनिक ऋण २० खर्ब ८० अर्ब रुपैयाँ पुगेको छ । गत वर्षको आठ महिनाको तुलनामा चालु आर्थिक वर्षको सोही अवधिमा सरकारले तिर्न बाँकी ऋण करिब २ खर्ब ३१ अर्ब ८७ करोड रुपैयाँले बढेको छ ।  गत आर्थिक वर्षको आठ महिनासम्म सरकारले तिर्न बाँकी सार्वजनिक ऋण १८ खर्ब ४८ अर्ब रुपैयाँ थियो । 

गत आर्थिक वर्षको अन्त्यसम्म तिर्न बाँकी सार्वजनिक ऋण २० खर्ब १३ अर्ब रुपैयाँ पुगेको थियो । गत फागुनसम्म सरकारले तिर्न बाँकी सार्वजनिक ऋण हेर्दा अहिले हरेक नेपालीको भागमा ७१ हजार २ सय ३४ रुपैयाँ बराबर छ ।  अर्थात हरे नेपालीले यो बराबर ऋण तिरेमा सरकार ऋण मुक्त हनेछ ।  

गएको वैशाख मसान्तसम्म सरकारले तिर्न बाँकी सार्वजनिक ऋण साढे २१ खर्बभन्दा माथि पुगेको छ । चालु आर्थिक वर्षको १० महिना साउनदेखि वैशाखसम्मको सार्वजनिक ऋण २१ खर्ब ५४ अर्ब १२ करोड रुपैयाँ पुगेको छ । जसमा आन्तरिक ऋणले बाह्य ऋणलाई उछिनेको छ । तथ्यांकअनुसार नेपालले तिर्न बाँकी ऋणमध्ये आन्तरिक ऋण १० खर्ब ८३ अर्ब ४७ करोड पुगेको छ । बाह्य ऋण १० खर्ब ७० अर्ब ६४ करोड रुपैयाँ छ ।

पछिल्लो ५ वर्षमा सरकारको ऋण दोब्बर भएको सरकारी तथ्यांक छ । आर्थिक वर्ष ०७४÷७५ मा यस्तो ऋण ९ खर्ब १७ अर्ब बराबर थियो । त्यसयता सार्वजनिक ऋण ०७५÷७६ मा १० खर्ब ४८ अर्ब, ०७६÷७७ मा १४ खर्ब ३३ अर्ब, ०७७÷७८ मा १७ खर्ब ३७ अर्ब, ०७८÷७९ मा २० खर्ब १३ अर्ब रुपैयाँ बराबर पुगेको छ । हरेक वर्ष ऋण बढेसँगै तिर्नुपर्ने साँवा र ब्याज पनि बढ्दै गएको छ । चालु आर्थिक वर्षको फागुनसम्म सरकारले ८० अर्ब ९९ करोड साँवा र ४० अर्ब ६८ करोड ब्याज भुक्तानी गरेको छ ।