विवेकशील साझाको संगठन प्रमुखमा रञ्जु दर्शना चयन

१५ जेठ, काठमाडौं । विवेकशील साझा पार्टीले ११ विभाग गठन गरेको छ । विभागका प्रमुख समेत तोकेको छ । पार्टी केन्द्रीय कार्यालयमा बसेको केन्द्रीय समिति बैठकले विभाग गठन र प्रमुख तोकेको हो । 

जसअनुसार प्रशिक्षण विभाग प्रमुखमा उपाध्यक्ष प्रकाशचन्द्र परियार र उपाध्यक्ष मिलन पाण्डेलाई नीति तथा कार्यक्रम विभाग प्रमुखको जिम्मेवारी दिइएको छ । महासचिव रञ्जु दर्शनालाई संगठन विभाग प्रमुख बनाइएको छ । 

सदस्यता व्यवस्थापन विभाग प्रमुखमा उपाध्यक्ष बिमला अधिकारी घिमिरे, तथ्यांक तथा अनुसन्धान विभाग प्रमुखमा सचिव बिमल तामाङ, सूचना प्रविधि तथा सञ्चार विभाग प्रमुखमा केन्द्रीय सदस्य सूर्यदीप रेग्मी, केन्द्रीय कार्यालय व्यवस्थापन प्रमुखमा केन्द्रीय सदस्य नवराज थापालाई जिम्मेवारी दिइएको छ ।

साथै वातावरण तथा सम्पदा विभाग प्रमुखमा केन्द्रीय सदस्य सुरज प्रधान, उद्यमशीलता तथा रोजगार विभाग प्रमुखमा केन्द्रीय सदस्य शिशिर बञ्जारा, अर्थ विभाग प्रमुखमा केन्द्रीय सदस्य निरञ्जन चापागाइँ र केन्द्रीय सदस्य धनेज थापालाई कृषि तथा सहकारी विभाग प्रमुखको जिम्मेवारी दिइएको छ ।