सरकार १७ खर्बकाे सिलिङमा बजेट ल्याउँदै

१५ जेठ, काठमाडौं । सरकारले आज आगामी आर्थिक वर्ष २०८०/८१ को वार्षिक बजेट सार्वजनिक गर्दैछ । अर्थमन्त्री डा. प्रकाशशरण महतले आगामी आर्थिक वर्षको अनुमानित आय व्ययसहितको बजेट आज संघीय संसद्को संयुक्त बैठकमा बेलुका ६ बजे बजेट वक्तव्यमार्फत बजेट प्रस्तुत गर्नेछन् । मुलुकको यो ७२औं आव बजेट हो । 

सरकार यो पटक १७ खर्ब ८९ अर्ब बराबरको बजेट ल्याउने तयारी गरेको बताइन्छ । सरकारले राष्ट्रिय योजना आयोगले दिएको बजेट सिलिङमा रहेर बजेट तय गरेको बताइएको छ । 

नियमित खर्चतर्फ फजुल खर्च कटौती तथा खर्च मितव्ययिता कायम गर्दै पुँजीगत खर्चमा जोड दिने किसिमबाट बजेट तयार पारिएको बताइएको छ ।

यद्यपि, चालू आर्थिक वर्ष सकिन ४७ दिन मात्र बाँकी रहँदा सरकारले पूँजीगत खर्च ३६ प्रतिशत गर्न सकेको छ । निर्माण, आयोजना लगायत पूर्वाधार विकासमा छुट्याइएको पूँजीगत खर्च ६४ प्रतिशतले कम खर्च हुँदा बजारमा पैसा पर्न गई गरिबीको रेखा उकालोतर्फ लाग्ने निश्चितप्रायः छ ।

मुलुकमा औपचारिक रुपमा  २००८ साल माघ २१ मा अर्थमन्त्री सुवर्ण शमशेरले नेपालको पहिलो बजेट ल्याएका थिए । कूल ५ करोड २५ लाख रुपैयाँ बराबरको उक्त वार्षिक बजेटमा उनले धनी र गरिबबीचको अन्तरलाई कम गराई राज्यको सम्पत्ति बढाउन केन्द्रित गरेको पाइन्छ ।